― Cunha inversión económica por parte da Administración Sanitaria Pública galega de máis de 170.000 euros tanto para a obra civil coma para o seu equipamento, esta nova unidade reforza a existente no centro de saúde pontevedrés de A Parda
― Dispón de tres fisioterapeutas e material necesario para tratamentos de Atención Primaria orientados á promoción do exercicio físico, as intenvencións comunitarias e diversos programas de orientación ao exercicio activo
A Área Sanitaria de Pontevedra e O Salnés activa a partires de hoxe, luns 18 de outubro, unha nova unidade de Fisioterapia de Atención Primaria emprazada no centro de saúde pontevedrés de Virxe Peregrina.
Cunha inversión económica por parte da Administración Sanitaria Pública galega de máis de 170.000 euros tanto para a obra civil coma para o seu equipamento, esta nova unidade de Fisioterapia de Atención Primaria en Virxe Peregrina reforza a que xa presta servizo no centro de saúde pontevedrés de A Parda.
Esta unidade de Fisioterapia de Atención Primaria dispón dun espazo físico de 135 metros cadrados de dependencias, emprazadas no andar soto do centro de saúde capitalino, e contan cunha distribución que inclúe unha sala de exercicios físicos e tratamentos, catro cabinas específicas para aplicar técnicas de fisioterapia, un despacho para os profesionais desta especialidade asistencial, sala de espera e vestiarios con aseos.
Cadro profesional de tres fisioterapeutas
A nova unidade de Fisioterapia de Atención Primaria no centro de saúde de Virxe Peregrina conta cun cadro profesional de tres fisioterapeutas así coma con material necesario para tratamentos de Atención Primaria orientados á promoción do exercicio físico, as intenvencións comunitarias e diversos programas de orientación ao exercicio activo.
Estas iniciativas continúan a ser un obxectivo prioritario para a Área Sanitaria de Pontevedra e O Salnés cara a continuar avanzando na prevención tanto do sedentarismo coma na educación poboacional e nos autocoidados das persoas.
