Os resultados indican o encomiable e exemplar esforzo que se realizou durante o pasado ano, tendo en conta o contexto epidemiolóxico internacional no que se está inmerso
A Área Sanitaria de Pontevedra e O Salnés continuou a manter ao remate do pasado ano 2020 uns moderados tempos medios de espera para intervencións cirúrxicas, primeiras consultas e para primeiras probas diagnósticas no marco do Sistema Sanitario Público galego, refrendando unha dinámica asistencial na que continúa a incidir para avanzar na mellora das demoras.
Os datos oficiais do Servizo Galego de Saúde revelan que, grazas ao inxente esforzo engadido pola situación epidemiolóxica actual e á boa labor de equipo dos profesionais, esta Área Sanitaria pechou o ano 2020 cun tempo medio de espera para unha intervención cirúrxica de 73,7 días -78,4 días no Complexo Hospitalario Universitario de Pontevedra e 44,9 días no Hospital Público do Salnés-.
Recuperación
No segundo semestre do ano recuperouse de xeito importante a situación do primeiro semestre, posto que a 30 de xuño de 2020 o tempo medio de espera cirúrxico na Área Sanitaria era de 92,1 días -94,2 no Complexo Hospitalario Universitario de Pontevedra e 76,6 días no Hospital Público do Salnés- cifras resultantes dun período de estado de alarma e confinamento dos cidadáns. Finalmente, mellorouse en case 20 días a demora media do mes de xuño.
Ao longo do pasado ano leváronse a cabo nesta Área Sanitaria un total de 18.099 intervencións cirúrxicas -11.130 no Complexo Hospitalario Universitario de Pontevedra e 6.969 no Hospital Público do Salnés- cifras que supoñen unha media diaria de algo máis de 80 intervencións diarias.
No que atinxe aos pacientes con prioridade clínica, cómpre sinalar que a Área Sanitaria de Pontevedra e O Salnés pechou 2020 cunha demora media nas cirurxías de prioridade 1 de 9,3 días nos seus centros hospitalarios da Área.
Con respecto ás vías rápidas, coas que se pretende dar unha atención nun tempo inferior a quince días a aqueles pacientes con sospeita de patoloxía grave, a Área Sanitaria rematou 2020 cunha demora inferior aos 5 días dende a detección da doenza dun paciente en Atención Primaria ata a súa chegada á unidade do hospital que debe resolver a situación.
Hospitalizáronse, ao longo do pasado ano, un total de 13.543 pacientes en Pontevedra e O Salnés -9.418 no Complexo Hospitalario Universitario de Pontevedra e 4.125 no Hospital Público do Salnés- o que supuxo unha media diaria de 65 ingresos diarios.
Atención nas Urxencias
No que atinxe aos servizos de Urxencias, o pasado ano 2020 atendéronse na Área Sanitaria de Pontevedra e O Salnés un total de 247.561 pacientes, dos cales 147.938 recibiron asistencia nos Puntos de Atención Continuada en Atención Primaria, mentres que os restantes 99.623 nas urxencias hospitalarias –por centros sanitarios, 66.562 no Complexo Hospitalario Universitario de Pontevedra e 33.061 no Hospital Público do Salnés-.
A media de urxencias atendidas diariamente durante o pasado ano acadou na Área Sanitaria a cifra de 270 asistencias urxentes.
A demora media en consultas externas a 31 de decembro de 2020, foi de 35,2 días -por centros sanitarios, 30,7 días no Complexo Hospitalario Universitario de Pontevedra e 47,4 días no Hospital Público do Salnés-. O total de consultas atendidas no ano 2020 acadou os 2.163.649, das que 1.740.584 se atenderon en Atención Primaria, cunha porcentaxe do 35% de consultas de tipo presencial, e as restantes 423.065 nos hospitais -das que 100.219 foron primeiras consultas e as restantes 322.846 consultas de revisión- cunha porcentaxe de consultas atendidas telefónicamente do 32%.
A demora media en consultas externas tamén mellorou de xeito importante no segundo semestre do ano. As cifras a 30 de xuño de 2020 indican unha espera media de 50,9 días -38,3 días no Complexo Hospitalario Universitario de Pontevedra e 76,0 no Hospital Público de Salnés-. A mellora durante o segundo semestre acada arredor de 15 días menos de espera.
O Complexo Hospitalario Universitario de Pontevedra atendeu o pasado ano un total de 345.451 consultas -78.992 primeiras consultas e 266.459 consultas de revisión- mentres que o Hospital Público do Salnés atendeu durante 2020 un total de 78.014 consultas –delas, 21.227 foron primeiras e 56.787 de revisión-.
Demoras medias nas probas diagnósticas
As demoras medias nas probas diagnósticas a final do pasado ano 2020 foi de 41,8 días -14 días menos que a espera a finais de xuño- na Radioloxía da Área Sanitaria de Pontevedra e O Salnés -21,4 días no Complexo Hospitalario Universitario de Pontevedra e 50,1 días no Hospital Público do Salnés- e 29,9 días no conxunto da endoscopia dixestiva, urolóxica e xinecolóxica -16,3 días no Complexo Hospitalario. Universitario de Pontevedra e 43,9 días no Hospital Público do Salnés-.
Concretando máis as probas radiolóxicas, a demora media no TAC foi de 30,5 días -26,8 no Complexo Hospitalario Universitario de Pontevedra e 31,3 días no Hospital Público do Salnés-, respecto ao peche de xuño, que era entón de 93,1 días, diminuiuse a espera nuns 60 días.
No que atinxe á demora media para efectuarse unha Resonancia Magnética foi de 36,1 días -26,4 no Complexo Hospitalario Universitario de Pontevedra e 41,7 días no Hospital Público do Salnés-
Encomiable e exemplar esforzo no contexto epidemiolóxico
Estes resultados indican o encomiable e exemplar esforzo, adicación e comprometida implicación de todas e todos os profesionais das distintas especialidades e as diversas categorías, imprescindibles para dar máis e mellor atención asistencial aos pacientes da Área Sanitaria de Pontevedra e O Salnés durante o ano, tendo en conta o contexto epidemiolóxico no que estamos inmersos, cumprindo co compromiso de atender aos pacientes.
Dun xeito especial, cómpre salientar o pulo dos profesionais realizado cos pacientes que estaban esperando por unha cirurxía considerada de prioridade 1 e aqueles doentes que tiveron diagnósticos incluídos no Decreto de Garantías de Tempos Máximos de Atención, que son, na súa gran maioría, pacientes oncolóxicos e mesmo nas consultas e probas diagnósticas de vías rápidas de cancro
