Xosé Merelles acompañou ao bispo auxiliar de Gdansk (Polonia), Piortr Przyborek, na súa visita ao Centro Internacional de Acollida ao Peregrino de Santiago de Compostela
O Camiño de Santiago e a tradición xacobea seguen a estreitar a relación entre as persoas e os pobos. Así o puxo de manifesto o director de Turismo de Galicia, Xosé Merelles que acompañou ao bispo auxiliar de Gdansk (Polonia) e responsable da Comisión de Peregrinación da Conferencia Episcopal Polaca, Piotr Przyborek, durante a visita que realizou ao Centro Internacional de Acollida ao Peregrino de Santiago de Compostela.
O bispo auxiliar de Gdansk interesouse sobre todo pola xestión da acollida que se presta en Galicia e concretamente en Santiago de Compostela aos peregrinos, especialmente aos polacos que sumaron en 2024 case 7.500 persoas e supuxeron un incremento do 35% con respecto ao ano anterior.
Neste sentido, Xosé Merelles salientou a importancia do xacobeo entre o público polaco e destacou tamén a participación de representantes en organismos e institucións coma a Federación Europea do Camiño de Santiago, onde o seu vicepresidente é o Piotr Roszak, tamén presente na visita.
“Galicia e Polonia teñen unha estreita relación grazas á cultura e tradición xacobea”, salientou ao tempo que subliñou que se está estudando a instalación dun mojón na rexión polaca de Kujawsko-Pomorskie, concretamente na cidade de Torun, que “será o primeiro no país polaco”, afirmou.
Durante o percorrido polas instalacións, o director de Turismo de Galicia salientou que a internacionalización do Camiño está a ser unha constante nos últimos tempos, tal e como constata o feito de que en 2024, o 58% dos peregrinos fosen de orixe internacional.
