― A Área Sanitaria de Pontevedra e O Salnés continúa a xestionar cos profesionais en activo a cobertura asistencial e gardas neste centro de saúde
― O SERGAS reafirma o seu agradecemento e valoración pola importante implicación dos profesionais de Atención Primaria da Área Sanitaria efectuando voluntariamente substitucións e prolongacións de xornada e insta á plataforma en defensa da Sanidade Pública a que efectúe iniciativas útiles para a cidadanía
Coa garantía de atención sanitaria coma eixe da planificación asistencial, a Área Sanitaria de Pontevedra e O Salnés continúa a xestionar cos profesionais en activo a cobertura e gardas no centro de saúde de Baltar en Sanxenxo, ante a ausencia de profesionais especialistas en Medicina Familiar e Comunitaria nas listas de contratación para cubrir as ausencias dos titulares por mor das vacacións e das baixas e o compromiso da Sanidade Pública de prestar asistencia.
No que atinxe á actividade de renovación de receitas de tratamentos crónicos no centro de saúde de Baltar dende o pasado día 10 de agosto ata o venres día 19 de agosto realizáronse un total de 260 citas deste tipo. Os pacientes poden solicitar dita cita por teléfono ou a través da aplicación de Sergas Móbil no persoal farmacéutico de Atención Primaria.
O persoal médico e de Enfermaría do centro de saúde de Baltar atendeu a semana pasada unha media diaria de 136 pacientes, cunha labor de continuidade no seguemento e atención a patoloxías. Dita reordenación asistencial comezou a funcionar o mércores pasado, cambiando o modelo habitual de citación en axenda pola atención a demanda, nun momento puntual no que tan só tres médicos prestan asistencia neste centro.
Así mesmo, o SERGAS reitera que se están a tramitar administrativamente as solicitudes á OPE polo sistema de concurso de méritos realizada pola Xunta de Galicia, que consta de 106 prazas de médico especialista de Atención Primaria, das que 21 adscribiránse a 13 centros de saúde da Área Sanitaria de Pontevedra e O Salnés, entre eles o de Baltar en Sanxenxo.
Reforzo da reclamación da Xunta ao Goberno central
O SERGAS reafirma o seu agradecemento e valoración pola importante implicación dos profesionais de Atención Primaria da Área Sanitaria efectuando voluntariamente substitucións e prolongacións de xornada e insta á plataforma en defensa da Sanidade Pública a que efectúe iniciativas útiles para a cidadanía e reforce a reclamación que, dende hai meses, fai a Xunta de Galicia ao Goberno central para que adopte medidas áxiles e eficentes cara a paliar o déficit de médicos no conxunto do Sistema Nacional de Saúde.
