A vicesecretaría de Educación do Partido Popular de Ourense mantivo unha reunión de traballo, na sede provincial dos populares, co responsable Educación, Ciencia, Universidades e Formación Profesional do goberno galego, Román Rodríguez, acompañado polo vicesecretario de Educación do PPdeOU, Jesús Vázquez, así como as responsables das áreas de Ordenación e Innovación Educativa e de FP, Judith Fernández e Eugenia Pérez.
O encontro, no que participaron medio cento de profesionais do sector educativo e da docencia, serviu para analizar en profundidade a situación actual e os retos de futuro do sistema educativo en Galicia, así como para establecer un diálogo directo cos máximos responsables da administración no eido educativo e formularlles as necesidades, eivas e requerimentos que detectan a diario no desempeño do seu labor profesional.
Román Rodríguez puxo en valor a importancia de manter políticas estables para progresar e blindar a calidade do ensino “como vén facendo o PP desde 2009 na Xunta, comezando con Jesús Vázquez, de quen tomei o relevo”, lembrou.
O titular do departamento educativo da Xunta explicou que “a mellora do sistema desde entón non é algo subxectivo, senón unha variable medible en feitos como a redución do abandono educativo desde case o 26% de 2009 ao 10,8% de hoxe ou a posición de liderado que o alumnado galego ocupa hoxe en PISA, cando antes estaba por debaixo da media nacional”, dixo. Así mesmo, destacou que neste tempo se duplicou a matrícula de FP e se triplicou a inserción laboral nestas ensinanzas. “Aínda así, os novos retos que encara o ensino a nivel demográfico, social, tecnolóxico e ambiental obríganos a seguir traballando en novas fórmulas para continuar avanzando”, afirmou Román Rodríguez.
