― Incídese na importancia de seguir as medidas de protección e de extremar as precaucións, e aconséllase consultar a páxina web do CIAE 112 (www.axega112.gal), que conta con información meteorolóxica e con ligazóns de interese
― Co fin de garantir a seguridade dos bens e as persoas, o Goberno galego informou da situación aos concellos da provincia afectada, deputacións, servizos provinciais e agrupacións de voluntarios de Protección Civil e aos clubs náuticos, entre outros
A Xunta vén de activar a alerta laranxa por chuvia no suroeste da Coruña, ademais de manter a de vento no oeste desta provincia e de temporal costeiro nas provincias da Coruña e Pontevedra.
Co fin de garantir a seguridade dos bens e as persoas, a Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
Segundo a Axencia Estatal de Meteoroloxía (Aemet), prevense precipitacións acumuladas en 12 horas de 80 mm. O resto da provincia da Coruña está en alerta amarela. A Xunta lembra a importancia de circular con precaución ante as intensas precipitacións e informarse antes do estado das estradas, non atravesar zonas inundadas ou que poidan chegar a asolagarse e non aparcar nas ribeiras dos ríos.
Ademais, o fenómeno meteorolóxico adverso deixará rachas de ata 100 quilómetros por hora con ventos de compoñente sur no oeste da Coruña. O resto da provincia, así como a de Pontevedra e Lugo, e o noroeste e a montaña de Ourense están en alerta amarela.
Nestas zonas, sinálase a importancia de seguir as medidas de protección, como retirar os obxectos que poidan caer á rúa desde os tellados, balcóns e fiestras, e evitar pasar preto de edificios en ruínas ou en construción, de árbores, de paneis publicitarios e de obxectos susceptibles de desprazarse con vento.
Con respecto ao temporal costeiro, o vento do suroeste será de forza 8 e poderá acadar de xeito ocasional forza 9 con mar combinada do oeste ao suroeste con ondas de ata sete metros. A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións. Ademais, a Secretaría Xeral para o Deporte anunciou a suspensión da actividade deportiva federada no mar nos concellos afectados durante a xornada de hoxe.
A maiores, logo de recibir un aviso da Aemet ás 7,18 horas desta mañá, no que informan dun fenómeno meteorolóxico adverso observado por vento e de nivel laranxa para a zona Oeste da provincia de Coruña, vén de reunirse a Comisión Escolar de Alertas, que acordou suspender no día de hoxe mércores as actividades no exterior dos centros educativos radicados na zona oeste da provincia da Coruña. Segundo o mapa de zonas climáticas de Meteogalicia, este aviso atinxe a dez concellos da Costa da Morte que son Camariñas, Carnota, Cee, Corcubión, Dumbría, Fisterra, Mazaricos, Muxía, Vimianzo e Zas.
Aconséllase consultar a páxina web do CIAE 112 (www.axega112.gal), que conta con información meteorolóxica e con ligazóns de interese.
