— O director xeral de Emerxencias e Interior, Santiago Villanueva, presidiu hoxe a reunión do comité asesor do Sapraga
— O Plan estará vixente do 1 de xuño ata o 30 de setembro e a adhesión ten carácter voluntario para os concellos que teñan augas de baño censadas no Servizo Galego de Saúde
O director xeral de Emerxencias e Interior, Santiago Villanueva, presidiu hoxe a reunión do Comité Asesor do Plan de Protección Civil de Salvamento en Praias de Galicia (Sapraga) na que se constituíu este organismo, que terá como funcións asesorar e informar de todos os temas obxecto do plan e avaliar o seu seguimento.
Trátase da reunión previa ao comezo da campaña, prevista para o 1 de xuño, á que seguirá outro encontro de seguimento ao remate despois do 30 de setembro para avaliar o plan e dar conta das praias adheridas e as incidencias atendidas, así como a inclusión de melloras que redunden na seguridade da poboación.
Na reunión participou tamén a directora xeral de Administración Local, Natalia Prieto, así como representantes da Federación Galega de Municipios e Provincias (Fegamp), 061, Cruz Vermella, voluntarios de agrupacións de Protección Civil, Gardacostas e responsables en medio ambiente, turismo, xa que estes departamentos xunto co saúde pública e os organismos anteriores forman parte do Comité Asesor.
O Plan Sapraga para este 2023, que ten como obxectivo principal garantir a cobertura das emerxencias que poidan xurdir nas zonas de baño da comunidade, establecendo os procedementos de comunicación e coordinación cos servizos de emerxencias de Galicia (Platerga) no caso de emerxencias extraordinarias.
O novo Sapraga actívase con carácter estacional durante a época estival e, tendo en conta o marco competencial en materia de praias, a adhesión ten carácter voluntario para os concellos que teñan augas de baño censadas no Servizo Galego de Saúde (Sergas). Poden adherirse cantas praias estean no censo, debendo contar con servizo de socorrismo e Plan de Prevención e Seguridade segundo se determina no Plan.
No encontro de hoxe actualizouse o plan para integrar oito zonas de baño que se inclúen no censo, así como actualizar a normativa de socorrismo, pois neste mes de maio se publicou o Decreto que ven a revisar as condicións para exercer a vixilancia en praias ampliando as vías de inscrición no rexistro de socorristas e mantendo os estándares de calidade na formación do persoal.
O Sapraga está dirixido polo director xeral de Emerxencias e Interior, coa misión de asegurar o bo funcionamento do plan, o seguimento e avaliación das actuacións, e garantir a integración no Platerga e o enlace cos plans de contaminación mariña e o de Salvamento Marítimo.
O plan Sapraga é un plan sectorial de carácter preventivo e operativo, a través do cal se atenderán as emerxencias ordinarias no espazo das praias. En caso de emerxencia extraordinaria, a proposta do CIAE 112 Galicia, e previa valoración do risco pola Axega e o director xeral de Emerxencias e Interior, activarase o Platerga no nivel que corresponda, activando os grupos operativos que sexan necesarios e quedando nese momento integrado o Servizo Público de Prevención e Socorrismo da Praia no grupo de intervención do Platerga.
