— O conselleiro de Xustiza, Diego Calvo, remitiu unha carta ao ministro do ramo para solicitar a inclusión na orde do día dos asuntos que cómpre abordar para defender os intereses de Galicia
—O Goberno galego pide tratar a financiación ás comunidades con competencias transferidas polos costes da implantación da Lei de Medidas de Eficiencia do Servizo Público de Xustiza, a aprobación dos novos modelos de referencia, modificacións regulamentarias previstas en dita Lei, o impacto dos Medios Adecuados de Solución de Controversias (MASC) na quenda de oficio e a aprobación do marco común do teletraballo
A Xunta agarda que a Conferencia Sectorial de Xustiza, que se celebrará este venres en Barcelona, sirva para atender as peticións das comunidades autónomas e dar resposta ás súas demandas e non sexa unha mera declaración de intencións. O conselleiro de Presidencia, Xustiza e Deportes, Diego Calvo, remitiu unha carta ao ministro titular da carteira de Xustiza para solicitar a inclusión na orde do día dos temas que Galicia considera indispensable abordar.
Ditas cuestións son a financiación ás comunidades con competencias transferidas polos costes da implantación da Lei Orgánica 1/2025, de 2 de xaneiro, de medidas en materia de eficiencia do servizo público de xustiza, a aprobación dos novos modelos de referencia, modificacións regulamentarias previstas en virtude da Disposición Final 35ª de dita Lei, o impacto dos Medios Adecuados de Solución de Controversias (MASC) na quenda de oficio e a aprobación do marco común do teletraballo.
Tal e como detallou o conselleiro no seu escrito, a orde do día remitida polo Ministerio estaba conformada cun único punto e moi xenérico: Estado de implantación del Nuevo Modelo Organizativo en el Territorio del MPJRC y en las CCAA con competencias transferidas. Tendo en conta o momento actual, en pleno proceso de aplicación da Lei Orgánica 1/2025, de 2 de xaneiro, de medidas en materia de eficiencia do Servizo Público de Xustiza, o Goberno Galego considera que “hai decisións que deben ser tratadas en dita Conferencia e acordadas entre todos os seus integrantes” e, por esta razón, pediu a inclusión dos asuntos anteriormente referidos a fin de afondar neles o próximo venres.
O ministro de Xustiza respondeu á carta amosando a súa disposición para abordar estas cuestións pero non se remitiu unha nova orde do día que as contemple. Por iso, a Xunta insiste na remisión dunha nova orde do día que inclúa os puntos solicitados e pide que se tomen decisións ao respecto. O conselleiro remarcou neste senso que hai decisións pendentes que son fundamentais para a aplicación da nova Lei e que o Ministerio non pode esquivar tomar.
A Xunta agarda que poida haber unha nova orde do día e que na Conferencia se dea resposta ás peticións das comunidades para que esta sexa realmente efectiva e en aras á colaboración institucional e traballo coordinado para lograr unha administración máis áxil, eficaz e segura para a cidadanía.
O Goberno galego xa expresou en diversas ocasións que a Lei estatal de eficiencia xudicial non vén acompañada dunha transferencia orzamentaria polo que lamentou a falla dunha análise do custo inicial da súa implantación e que as novas normativa estatais non se acompañen dos orzamentos necesarios, cargando o custo da reforma nas comunidades autónomas con competencias en xustiza, como Galicia.
O proceso de implantación do novo modelo organizativo en Galicia suporá, entre outras adaptacións, actualizar os modelos de referencia das oficinas xudiciais, o seu regulamento e protocolos locais de actuación, elaborar e aprobar as relacións de postos de traballo en consenso coas organizacións sindicais, ademais da asignación de persoal aos postos de traballo correspondentes á nova organización. Tamén implicará a adecuación das instalacións e a dotación de aplicacións informáticas, o acondicionamento dos arquivos físicos e virtuais de expedientes e a execución de plans de comunicación e información ás partes interesadas.
Non obstante, a Xunta está a traballar para desenvolver a oficina xudicial co obxectivo de cumprir co que se demanda na lei pero, tal e como incidiu o conselleiro, Galicia agarda regresar da Conferencia Sectorial con solucións e que non sexa unha mera “sesión informativa”.
