— O Diario Oficial de Galicia publica hoxe a orde que recolle este incremento que permitirá atender a alta demanda do programa e beneficiar preto de 1.200 familias retornadas este ano
— Trátase duns apoios que supoñen un amparo moi importante no establecemento das persoas emigrantes galegas que retornaron, axudando á súa integración na comunidade galega
A Xunta de Galicia amplía o orzamento destinado ás axudas extraordinarias ao retorno nun 67%, pasando dos 2 millóns de euros iniciais aos 3,5 M€. Así o reflicte a resolución que publica hoxe o Diario Oficial de Galicia (DOG). Esta ampliación permitirá atender a alta demanda do programa e beneficiar un total de 1.159 familias retornadas este ano.
Trátase dunhas axudas que supoñen un amparo moi importante no establecemento das persoas que retornaron, axudando á súa integración na Comunidade galega. Con esta medida, a Xunta reafirma o seu compromiso con aqueles galegos que apostan por regresar á súa terra de orixe para iniciar unha nova etapa da súa vida.
As axudas extraordinarias ao retorno son un recurso fundamental que permite cubrir necesidades iniciais como o establecemento de persoas e familias que deciden fixar a súa residencia en Galicia.
Dende o seu inicio, este programa demostrou a súa eficacia ao ofrecer axudas directas que facilitan o proceso de regreso e asentamento, favorecendo ademais o retorno de familias que veñen con nenos e incentivan tamén o establecemento no rural.
Un apoio esencial para as familias retornadas
Nesta liña de axudas extraordinarias inclúese tamén unha axuda específica para as familias con fillos menores de idade que se establezan en Galicia, cun importe de 1.000 euros por fillo ata o segundo fillo, e de 1.500 euros a partir do terceiro, cun incremento do 25% no caso de que a familia resida nun concello rural, co obxectivo de dar pleno cumprimento aos obxectivos de reforzar o apoio destinado a familias con cargas familiares, con especial atención ás que establezan a súa residencia nunha zona rural.
Con esta ampliación orzamentaria, a Xunta afonda no seu compromiso de apoio ás persoas galegas do exterior que, co seu regreso, contribúen a fortalecer o futuro de Galicia. A integración social e laboral, xunto co apoio ás familias retornadas, é unha prioridade do Goberno galego para consolidar o retorno como unha oportunidade de desenvolvemento e crecemento para a nosa comunidade.
