- O conselleiro de Presidencia, Xustiza e Deportes visitou Muxía, un dos concellos beneficiarios da orde de axudas
- A pesar de ser unha competencia local, o Goberno galego contribúe a cubrir os gastos da contratación destes profesionais entre o 1 de xuño e o 30 de setembro
- A medida enmárcase no compromiso autonómico cos servizos de emerxencias locais
O conselleiro de Presidencia, Xustiza e Deportes, Diego Calvo, visitou hoxe Muxía para comprobar o traballo realizado polo servizo de socorrismo contratado co apoio da Xunta a través dunha orde de axudas dotadas con 1,5 millóns de euros. Este ano a cifra de concellos beneficiarios ascendeu a 194, fronte aos 182 de 2024. A Coruña é a que suma máis municipios con achegas, con 60, seguida de Ourense, con 55, de Lugo, con 41, e de Pontevedra, con 38.
Segundo explicou o conselleiro, a través desta convocatoria de axudas para a prestación do servizo de vixilancia, rescate e salvamento nos espazos acuáticos naturais e en instalacións acuáticas descubertas, o Goberno galego contribúe a cubrir os gastos da contratación destes profesionais entre o 1 de xuño e o 30 de setembro. O obxectivo é garantir a seguridade nas praias, piscinas ou outras instalacións acuáticas durante os meses de verán.
Esta subvención foi concedida en réxime de concorrencia competitiva, de xeito que todos os concellos solicitantes recibiron axuda. As achegas foron asignadas segundo os criterios de valoración establecidos nas bases da convocatoria como o número de zonas de baño inscritas no Rexistro de Augas de Baño de Galicia, número de areais con bandeiras azuis en 2024, a poboación do concello, a adhesión ao Plan de Protección Civil de Salvamento nas Praias de Galicia (Sapraga) o pasado ano e a declaración de municipio turístico galego.
Deste xeito, pese a que a vixilancia de praias e lugares públicos de baño e o seu mantemento compete aos concellos, a Xunta, no marco do seu compromiso cos servizos de emerxencias locais, contribúe a fomentar a prestación do servizo de socorrismo por parte dos municipios nas épocas de maior concorrencia, como é a tempada estival.
Apoio ás emerxencias locais
O conselleiro referiuse ao apoio autonómico ás Agrupacións de Voluntarios de Protección Civil e aos Grupos de Emerxencias Supramunicipais, no que o Goberno galego investiu case 100 millóns de euros nos últimos anos en axudas ao funcionamento, cesión de material e formación. Nesta liña de acción, concretamente Muxía recibiu nos últimos anos preto de 60.000 euros en axudas ao funcionamento da AVPC e dotacións materiais valoradas en 138.000 euros.
Por outra banda, a Xunta regula a formación que deben reunir os socorristas e que nos últimos anos -en consenso coa Federación Galega de Municipios e Provincias (Fegamp), Cruz Vermella e outras entidades- se ampliaron e flexibilizaron as vías de acceso para exercer a profesión. Cómpre lembrar que, tamén de cara a época estival, a Xunta conta con outras medidas para garantir a seguridade nos municipios máis turísticos como é o caso das subvencións para a contratación de auxiliares de Policía Local.
