Técnicos da Consellería de Medio Ambiente e Cambio Climático avaliarán a idoneidade das seis parcelas propostas polo Goberno municipal, situadas na contorna da praza dos Paxariños, na avenida de Fontiñas
A directora xeral de Patrimonio Natural, Marisol Díaz, mantivo hoxe un encontro con representantes do Concello de Lugo coa finalidade de analizar posibles localizacións para a construción dun parque canino na cidade. O obxectivo desta medida é proporcionar áreas seguras nas que convivir de xeito harmonioso cos animais de compañía.
Os responsables municipais trasladaron que o Goberno local conta con seis parcelas na contorna da praza dos Paxariños, na avenida de Fontiñas, nas que podería desenvolverse o proxecto. Polo tanto, unha vez coñecidas estas posibles localizacións, técnicos da Consellería de Medio Ambiente e Cambio Climático visitarán a zona para avaliar a súa idoneidade e determinar cal é o máis axeitado para construír o parque canino.
Esta reunión enmárcase no compromiso da Xunta co benestar animal e na previsión de construír un parque canino en cada unha das sete grandes cidades de Galicia, para o que os concellos terán que autorizar a dispoñibilidade dos terreos, debidamente cualificada, para poder executar a actuación e o Goberno galego encargarase de dotalos dos elementos necesarios.
Esta medida a prol do benestar dos animais de compañía engádese a outras como as axudas aos concellos, entidades protectoras e particulares para a protección dos animais de compañía, con preto de 1,4 millóns de euros de orzamento para este ano, o triplo que en 2024, e que se poden solicitar desde o pasado mes de xaneiro ata o vindeiro 12 de setembro.
Neste eido, o Executivo galego tamén conta con apoios para fomentar a adopción de animais domésticos -cans e gatos- de compañía abandonados acollidos nos centros de recollida autorizados na comunidade. O período de presentación de solicitudes está aberto ata o 30 de setembro e o importe máximo da axuda é de 150 euros por animal da especie canina e de 125 euros no caso de felinos subvencionando custos como os derivados da identificación, esterilización, desparasitado e vacinación dos animais.
