Ángeles Vázquez salienta a necesidade de que este equipamento social conte cunha zona exterior adecuada e accesible para os usuarios
A Xunta colaborará na mellora e urbanización da parcela na que se localiza o centro de estancia de Campo Lameiro. A conselleira de Medio Ambiente, Territorio e Vivenda, Ángeles Vázquez, mantivo unha reunión co rexedor, Carlos Costa, para coñecer as demandas e necesidades desta entidade local, e comprometeulle o seu apoio neste proxecto municipal.
Vázquez Mejuto salientou que a actuación que pretende o Concello é unha grande oportunidade para habilitar unha zona exterior que prolongue os espazos deste equipamento social e que de seguro será empregado polos usuarios deste centro de estancia como unha sala de ocio anexa.
Lembrou que a pandemia puxo de manifesto a importancia de contar con espazos abertos e accesibles nos que poder facer vida, polo que con esta actuación se habilitará unha zona de visita e de encontro entre os familiares e as persoas atendidas por este centro, na que ademais poidan estar ao aire libre.
Nese sentido, a conselleira solicitoulle ao alcalde o envío do proxecto definitivo á Dirección Xeral de Urbanismo co fin de analizalo e determinar a vía de colaboración máis apropiada para que saia adiante.
Por último, Ángeles Vázquez felicitou a rexedor por apostar por este tipo de iniciativas que melloran a calidade de vida dos veciños, ao tempo que defende un uso ordenado e sostible do territorio.