- A convocatoria, publicada hoxe no Diario Oficial de Galicia, avaliará os coñecementos en matemáticas, lingua galega, lingua castelá e inglés
- Está dirixida a persoas que non teñan título da ESO ou Bacharelato e que desexen cursar certificados profesionais que inclúen como requisito esa formación
- Desenvolveranse dúas probas, en maio e en outubro, para que os participantes que no primeiro exame non superaran algunha competencia na que se inscribiron teñan unha segunda oportunidade sen ter que agardar a unha nova convocatoria
- Desde 2009 xa participaron neste procedemento preto de 46.000 galegos e galegas
A Xunta convoca hoxe no Diario Oficial de Galicia (DOG) as probas de avaliación en competencias clave para que as persoas que non posúen a Educación Secundaria Obrigatoria (ESO) ou o Bacharelato poidan acreditar os seus coñecementos, acceder á formación para o emprego e cursar os certificados profesionais que requiren deses requisitos académicos.
O Goberno galego estima que unhas 3.000 persoas poidan acceder á convocatoria 2025, na que se valorarán as competencias das persoas participantes en matemáticas, lingua castelá, lingua galega e inglés.
A presentación de solicitudes será desde mañá ata o vindeiro 14 de febreiro e pode realizarse a través da Sede Electrónica da Xunta (código de procedemento TR306A). Está previsto que os exames teñan lugar na segunda quincena de maio e na primeira de outubro. Esta última data ofréceselles aos participantes que se presenten á primeira proba e que, como resultado da mesma lles quede pendente de superar algunha competencia na que se inscribiron. Así, dáselles a oportunidade de completar a superación de todas as competencias clave sen necesidade de ter que esperar a unha nova convocatoria.
O Goberno galego convoca estas avaliacións co obxectivo de facilitar que as persoas traballadoras galegas poidan acceder ás accións formativas dos certificados profesionais de nivel 2 e 3, que requiren estar en posesión de titulacións mínimas ou ter as competencias clave necesarias. Para acadalas, ademais de facer as probas que hoxe se convocan, as persoas interesadas tamén poden realizar cursos de formación específicos.
Con estas medidas a Xunta trata de favorecer o acceso á cualificación profesional de galegos e galegas, sen que a súa formación académica previa poida resultar un impedimento á hora de incrementar as súas opcións laborais no futuro.
Co obxecto de facilitar a preparación á proba, a Consellería de Emprego, Comercio e Emigración ten a disposición no Campus Virtual de Emprego, contidos formativos, probas e un servizo de titoría, de xeito que as persoas que o desexen, ao seu ritmo en modo autoformación, poidan prepararse para concorrer a estas probas. Pódese acceder través da seguinte ligazón: https://conselleriaemprego.xunta.gal/formacion/competencias-clave/autoformacion-campus-virtual.
Ligazón á convocatoria no DOG:
https://www.xunta.gal/dog/Publicados/2025/20250114/AnuncioG0767-121224-0001_gl.html
