Ángeles Vázquez salienta a importancia da rolda de contactos iniciada o mes pasado cos principais sectores, organizacións profesionais e entidades afectadas pola futura norma, unha vez finalizada a consulta pública previa e iniciada a redacción do primeiro borrador
A Xunta impulsará a creación do Consello Técnico de Políticas Ambientais de Galicia como novo órgano consultivo e de cooperación para favorecer a participación das administracións públicas e dos sectores máis representativos no eido profesional, económico, social e universitario no seguimento e impulso das políticas ambientais na comunidade.
Así llo trasladou hoxe a conselleira de Medio Ambiente e Cambio Climático, Ángeles Vázquez, a representantes dos órganos directivos dos colexios oficiais de Enxeñeiros Industriais, Enxeñeiros Agrónomos e Enxeñeiros de Minas, ademais das organizacións profesionais de Químicos e de Biólogos de Galicia, cos que se reuniu para abordar o contido e obxectivos da futura Lei de administración ambiental simplificada de Galicia.
De feito, esta xuntanza enmárcase na rolda de contactos iniciada polo departamento autonómico a finais do pasado mes de outubro co fin de consensuar o documento inicial cos principais sectores, colectivos e entidades que, pola súa actividade profesional ou finalidade principal, se poidan ver afectados directa ou indirectamente pola futura lei.
Unha vez superada a fase de consulta pública previa da norma, que finalizou o pasado 1 de setembro, a conselleira aproveitou a reunión para explicarlles aos representantes dos colexios citados que o próximo paso será abordar a redacción do borrador normativo ao tempo que seguirá citando a outras entidades para coñecer a súa opinión de cara a recompilar ideas e buscar un texto participado e de consenso.
Neste sentido, Vázquez Mejuto subliñou a importancia de que as entidades e colectivos interesados teñan ocasión de expoñer os problemas que cren que a norma pode resolver para garantir que responda tamén ás demandas e necesidades do sector.
Os encontros prolongaranse ao longo de novembro e decembro co obxectivo de poder contar cun primeiro borrador da norma antes de que remate o ano e remitir o proxecto ao Parlamento galego para a súa aprobación en 2025.
Cómpre lembrar que coa Lei de administración ambiental simplificada a Xunta aspira a situar Galicia nunha posición de vangarda a través da aprobación dun dos ordenamentos ambientais máis modernos e innovadores de todo o país, que garanta e ofreza á vez a seguridade xurídica que demandan neste eido tanto promotores como administracións.
