Luis Arosa, concelleiro de Servizos en funcións, amósase convencido de que a Consellería de Educación ten previsto realizar directamente os traballos
O goberno local recibiu esta semana a denegación da Xunta de Galicia da subvención de 230.000 euros solicitados para a mellora da envolvemente da cuberta do colexio Torre-Illa e máis para a adquisición dun vehículo co que facer as tarefas de recollida e mantemento dos composteiros arousáns.
O goberno local, agora en funcións, presentara a proposta á distribución do Fondo de Cooperación Local xestionado pola Xunta de Galicia durante o prazo habilitado para esta tramitación e confíaba nun repartido equitativo destes recursos públicos para mellorar ambos servizos.
A Luis Arosa, concelleiro en funcións de Servizos, resúltalle sorprendente que a proposta da Illa non acadase a puntualización necesaria no baremo estipulado pola Xunta, cando “é sobradamente coñecida a necesidade de solventar as deficiencias que ten a cuberta do centro escolar”.
Sen embargo, Arosa apunta que os problemas de humidades e filtracións que é necesario solventar no teito do CEIP Torre-Illa responden a un problema estrutural e non de mantemento polo que, asegura, “estou casi convencido de que que esta subvención denegáronna porque a Consellería de Educación ten previsto cumprir coas súas obrigas coa Arousa e reparar directamente esa cuberta”. Luis Arosa tira de ironía para afirmar que esa “vai ser unha das primeiras boas novas que reciba o vindeiro goberno da Illa”.
