A Xunta destaca a aposta pola modernización dos negocios recoñecidos cos premios do comercio galego 2025 e presenta anov a imaxe para impulsar o sector

• González felicitou aos premiados e finalistas e destacou a gala como unha oportunidade para visibilizar un sector clave para a economía galega e para a dinamización das cidades e vilas, con especial fincapé no rural
• Co mesmo afán de promover un sector comercial forte, innovador e competitivo, aproveitou para poñer en valor a nova imaxe do Comercio Galego, un selo distintivo que quere enxalzar a identidade e excelencia dos establecementos de proximidade
• O conselleiro enmarcou ambas iniciativas no Plan estratéxico do comercio de Galicia 2025-2030, ao abeiro do que se consolidarán en 2026 accións de éxito como os bonos Activa Comercio e outras novidosas como Vilas Vivas, Localízate ou Prato de Mercado

O conselleiro de Emprego, Comercio e Emigración, José González, xunto coa delegada territorial da Xunta na Coruña, Belén do Campo, e o director xeral de Comercio e Consumo, Gabriel Alén, clausurou hoxe a entrega dos Premios do Comercio Galego 2025 nun acto no que se aproveitou para presentar en sociedade a nova imaxe do Comercio Galego, coincidindo ademais co arranque dunha nova campaña autonómica para darlle un pulo ao sector. González cualificou a cita —na que tamén estiveron a xerente da Fundación Artesanía de Galicia, Elena Fabeiro, e a xerente do Instituto Galego do Consumo e da Competencia, Sol Vázquez— como unha oportunidade idónea para visibilizar un sector clave para a economía galega, caracterizado pola súa riqueza e diversidade ao servizo da cidadanía e en beneficio da dinamización das cidades e vilas, con especial fincapé no rural.

Na súa intervención, o conselleiro puxo en valor o bo facer dos negocios recoñecidos cos Premios do Comercio Galego 2025 nas categorías do Premio Comercio Galego, Premio Comercio Traxectoria, Premio Comercio Emprende, Premio Comercio Dinamización e Premio Comercio Sostible. O titular de Comercio resaltou as achegas de todos e cada un dos premiados e finalistas a un sector comercial forte, moderno e competitivo capaz de adaptarse ás novas tendencias e demandas das persoas consumidoras. Animounos a seguir por esa senda co apoio da Xunta para que se estenda o seu exemplo e se siga xerando riqueza e emprego, ademais de vertebrando o territorio e fixando poboación.

Nova imaxe do Comercio Galego

O conselleiro aproveitou o acto para poñer de relevo a nova imaxe do Comercio Galego, que se presenta hoxe en sociedade. Trátase dun selo distintivo que quere enxalzar a identidade e excelencia dos comercios de proximidade, auténticos servizos públicos a pé de rúa, “unha vertente máis do Galicia Calidade que quere consolidar a ilusión e orgullo que serve cada día de motor aos comerciantes da nosa Comunidade, para seguir protagonizando ese emprendemento ligado ao territorio que tanto defendemos”.

Todo para seguir potenciando un sector que abrangue máis de 32.000 establecementos e dá emprego a preto de 107.000 persoas, no marco do Plan estratéxico do comercio de Galicia 2025-2030. Ao seu abeiro, segundo destacou González, consolidaranse en 2026 accións de éxito como os bonos Activa Comercio.

A maiores, impulsaranse iniciativas novidosas como o proxecto de recuperación de contornas comerciais urbanas senlleiras Vilas Vivas, que arrincará na ponte de decembro en Ribadavia; o proxecto Localízate, destinado a atraer a mocidade ao comercio local; ou Prato de Mercado, para visibilizar as sinerxías entre as prazas de abastos e a hostalaría. No eido da artesanía, estrearanse as formacións para aprendices (1 M€), e crearase en Santiago de Compostela a Casa do Artesán, que exercerá de sede da Fundación Artesanía de Galicia e albergará unha exposición permanente con pezas de artesáns do selo.