― José González subliñou o papel activo da comunidade galega na representación das autonomías durante a negociación da Estratexia Española de Seguridade e Saúde no Traballo e na coordinación de accións desta folla de ruta, entre outras accións
― Puxo en valor a Estratexia de Seguridade e Saúde no Traballo de Galicia: Horizonte 2027, unha ferramenta transversal que atende tanto ás situacións de riscos tradicionais como ás novas realidades do mercado laboral
― Destacou o papel das arredor de 300 persoas participantes no Congreso Nacional de Seguridade e Saúde Laboral para garantir a saúde das persoas traballadoras
― Salientou a suba do 3% no orzamento de 2025 do Instituto Galego de Seguridade e Saúde Laboral, que será de arredor de 8 M€, para reforzar o labor deste centro
O conselleiro de Emprego, Comercio e Emigración, José González, puxo hoxe de relevo a proactividade e o compromiso de Galicia na prevención de riscos laborais e a prol de contornas de traballo saudables e seguras. Nesta liña, destacou o papel activo da comunidade galega na representación das autonomías durante a negociación da Estratexia Española de Seguridade e Saúde no Traballo e na coordinación de accións desta folla de ruta, así como o ofrecemento da comunidade para acoller o I Congreso Nacional de Seguridade e Saúde Laboral.
Así o sinalou na clausura deste evento, que se celebrou onte e hoxe na Coruña e onde estivo acompañado polo secretario xeral de Emprego e Relacións Laborais, Pablo Fernández, e pola xerente do Instituto Galego de Seguridade e Saúde Laboral (Issga), Adela Quinzá-Torroja, e que foi organizado polo Instituto Nacional de Seguridade e Saúde no Traballo.
Alí tamén puxo en valor a Estratexia de Seguridade e Saúde no Traballo de Galicia: Horizonte 2027, unha ferramenta transversal que complementa á folla de ruta nacional e que atende tanto ás situacións de riscos tradicionais como ás novas realidades do mercado laboral e que é froito da escoita activa e do diálogo social cos axentes implicados.
Dentro desta estratexia salientou o Laboratorio de riscos psicosociais, ferramenta creada recentemente entre o Goberno galego e a Universidade de Santiago de Compostela para atallar cuestións como o estrés, a violencia e o desgaste profesional. Tamén se referiu ás campañas de prevención e concienciación do Issga en distintos sectores.
Nesta liña, José González subliñou o valor da colaboración público-privada para poñer en marcha medidas que impliquen ás administracións, empresas e ás persoas traballadoras a prol de contornas laborais seguras, saudables e sostibles e para facer fronte aos riscos psicosociais e a retos como o cambio climático, a dixitalización ou o absentismo.
Ademais, destacou o papel das arredor de 300 persoas que reuniu este congreso en facer da prevención de riscos unha prioridade e en garantir a saúde das persoas traballadoras. Entre eles, directores xerais da área de traballo das administracións estatal e autonómicas e responsables de institutos autonómicos de seguridade e saúde laboral e doutros países. Tamén representantes das persoas traballadoras, de empresas e persoal técnico en prevención de riscos laborais, entre outros.
Impulso ao Issga
En canto ao Instituto Galego de Seguridade e Saúde Laboral, o conselleiro puxo de relevo o incremento dun 3% no orzamento de 2025 deste centro dependente da Consellería de Emprego, Comercio e Emigración, que será de arredor de 8 millóns de euros. A este importe hai que sumarlle o das axudas en materia de prevención de riscos laborais, incluída promoción, de preto de 3 millóns de euros.
