— Ángeles Vázquez explica que a previsión do Goberno galego é actuar este ano en arredor de 550 quilómetros de ríos galegos coa execución de labores de conservación e limpeza
— Subliña que Augas de Galicia actuará en máis de 7 quilómetros de canles fluviais en Moaña, cun orzamento de 160.000 euros
A Xunta de Galicia destina este ano preto de 2,7 millóns de euros a actuacións de conservación fluvial en toda Galicia para incrementar a súa resiliencia ante posibles inundacións, segundo dixo hoxe a conselleira de Medio Ambiente e Cambio Climático, Ángeles Vázquez, durante a súa visita aos traballos realizados no rego da Freixa, en Moaña.
Estas actuacións, que se levan a cabo ao abeiro do plan autonómico de conservación dos ríos da demarcación Galicia-Costa, consisten habitualmente na retirada de árbores caídas nas canles fluviais, na limpeza das marxes, no control de especies exóticas invasoras e na eliminación de obstáculos que impidan o discorrer libre das augas.
A conselleira engadiu que a previsión do Goberno galego é actuar este ano en arredor de 550 quilómetros de ríos galegos coa execución de labores de conservación e limpeza que incrementen a súa resistencia ante os efectos causados por posibles inundacións e reforcen á vez a calidade ambiental das súas augas e contornas. Ángeles Vázquez incidiu tamén en que se prestará especial atención ás Áreas de Risco Potencial Significativo de Inundacións (ARPSI).
De feito, a zona que visitou hoxe a conselleira en Moaña está catalogada como ARPSI. Nesa liña, Ángeles Vázquez subliñou que Augas de Galicia actuará en máis de 7 quilómetros cun orzamento de 160.000 euros. Máis polo miúdo, os traballos levaranse a cabo en máis de 3 quilómetros do río Miñouva, ao seu paso pola parroquia de San Pedro de Domaio, así como nos regos da Freixa, San Bartomeu, A Fraga, O Inferno, A Xeira e o Barranco do Faro. A previsión é que estas actuacións rematen o vindeiro mes de xuño.
Cómpre salientar que o obxectivo do plan de conservación dos ríos de Augas de Galicia é manter as condicións naturais das canles fluviais, recuperar a súa funcionalidade xeomorfolóxica, eliminar especies vexetais que prexudiquen ou substitúan ás autóctonas e retirar os restos de vexetación co fin de evitar inundacións naturais das zonas adxacentes.
Ademais, para encarar as posibles enchentes nos ríos da demarcación que xestiona, o organismo hidráulico galego conta cunha estratexia de actuación que se desenvolve a través dunha serie de medidas preventivas, da protección das áreas inundables e de labores de restauración e conservación fluvial como os xa sinalados. Neste sentido, a Xunta mobilizará en 2025 máis de 35 millóns de euros na planificación e posta en marcha de diversas actuacións fronte aos riscos de inundación nesta conca.
