- Celebran que a resolución do Tribunal de Xustiza de Luxemburgo garante ao fin a seguridade xurídica, xa que avala a tramitación ambiental que se fai na Comunidade
- Ángeles Vázquez e EGA instan ao Alto Tribunal galego a que empece a ter en conta o interese público superior na tramitación dos procedementos que debe retomar
A Xunta e a Asociación Eólica de Galicia (EGA) celebraron hoxe a recente sentenza do Tribunal de Xustiza da Unión Europea (TXUE) que avala a tramitación ambiental dos proxectos eólicos aplicada na Comunidade e en base á mesma, instaron ao Alto Tribunal galego a acabar o antes posible coa situación de paralización xudicial que afecta a este sector desde o ano 2022.
Antes de manter unha reunión para analizar o alcance e as implicacións da resolución do TXUE, a conselleira de Medio Ambiente e Cambio Climático, Ángeles Vázquez, e o presidente da Asociación Eólica de Galicia (EGA), José Manuel Pazo, coincidiron na importancia deste fallo, xa que, tal e como expuxeron, garante a seguridade xurídica que demandaba o sector para poder continuar co seu desenvolvemento na Comunidade.
Neste sentido, cómpre lembrar que actualmente en Galicia hai 92 parques eólicos (PE) afectados por algún recurso xudicial en curso, dos que 86 xa están suspendidos —70 deles paralizados pola prexudicialidade casacional e 16 por outras causas—.
Por iso e tendo en conta a cantidade de procedementos afectados na Comunidade desde o ano 2022, a conselleira insistiu na necesidade de que, unha vez coñecida a postura do Alto Tribunal europeo (como máxima autoridade intérprete da normativa comunitaria), o TSXG retome a tramitación dos mesmos ao non existir xa ningunha xustificación para manter a actual situación de bloqueo xudicial.
De feito, lembrou que a postura do TXUE coincide coa xa manifestada polo Tribunal Supremo, que ratificou, con catro sentenzas ditadas entre os anos 2023 e 2025, que o procedemento aplicado pola Xunta para autorizar estes proxectos se axustaba á lei.
Acompañada polo secretario xeral da Asesoría Xurídica da Xunta, Manuel Pillado, a secretaria xeral Técnica da consellería, Carmen Bouso, e a directora xeral de Enerxías Renovables e Cambio Climático, Paula Uría, a conselleira insistiu en que todos os argumentos e obxeccións expostos por parte do TSXG con relación aos eólicos autorizados nos últimos tres anos e medio, quedaron resoltos xa cos pronunciamentos do Supremo e do TXUE, validando sempre a actuación do Goberno autonómico.
Por iso e ante este novo escenario, a conselleira e os representantes de EGA coincidiron na necesidade de instar ao Tribunal Superior de Xustiza de Galicia a que empece a aplicar en todos os preitos eólicos que ten que desbloquear o principio de interese publico superior das enerxías renovables, tal e como se recolle na Directiva de 2023 do Parlamento e do Consello Europeo relativa á promoción deste tipo de proxectos.
De feito, Ángeles Vázquez lembrou que a Xunta leva anos recoñecendo e aplicando este criterio na tramitación en Galicia tanto de parques eólicos como doutro tipo de iniciativas relacionadas co sector das renovables, que xogarán un “papel clave” para garantir a transición enerxética da Comunidade, para avanzar nos obxectivos comunitarios de descarbonización e tamén para acadar a neutralidade climática —o equilibrio entre as emisións e as absorcións— no horizonte do ano 2040.
