- O obxectivo da xuntanza é planificar e definir as pautas que dinamicen o idioma no ensino superior
- Posteriormente, tivo lugar un encontro coa comisión técnica que se está a ocupar da renovación do Plan xeral de normalización e que afronta a fase final de entrevistas
O secretario xeral da Lingua, Valentín García, e o secretario xeral de Universidades, José Alberto Díez, participaron hoxe na Coruña na reunión ordinaria da Comisión Interuniversitaria de Política Lingüística, xunto cos representantes dos órganos de goberno das tres universidades públicas galegas e membros dos seus servizos de normalización lingüística.
Así, segundo a orde do día da xuntanza, afondouse nas liñas de actuación na comunidade universitaria en materia de lingua, acordando pautas de actuación conxuntas en prol da dinamización e do fomento do uso do galego no ámbito do ensino superior, onde, apuntou Valentín García, “se observa un incremento das horas de docencia na lingua”.
Esta comisión creouse no 2009 para darlle cumprimento á medida dirixida á área do ensino no marco do Plan xeral de normalización da lingua galega de 2004, que propoñía a creación dunha comisión estable que asumise a planificación e a coordinación da política lingüística universitaria en Galicia.
Fase final das entrevistas para a renovación do Plan de normalización
Posteriormente a esta reunión ordinaria, a Comisión Interuniversitaria de Política Lingüística mantivo un encontro coa comisión técnica encargada de coordinar os traballos de renovación do Plan xeral de normalización da lingua galega, que preside Manuel González, profesor emérito da Universidade de Santiago, coordinador científico do Centro Ramón Piñeiro e académico da lingua galega.
A reunión tivo lugar ao abeiro da rolda de entrevistas con organismos e entidades que traballan na promoción do uso do galego que está a realizar tanto a comisión técnica como os 10 grupos de traballo sectoriais que se ocupan da actualización do plan. Neste senso, cómpre destacar que a finais deste mes darase por concluída a primeira fase deste proceso, que continuará co estudo das achegas e definición das liñas de acción a incluír no novo texto, que está previsto que chegue ao Parlamento de Galicia en novembro.
