O orzamento de Augas de Galicia sobe o vindeiro ano 2025 ata os 144 M€, para seguir optimizando o saneamento e o abastecemento coa mellora de infraestruturas, a formación e a execución de políticas activas de resposta ao cambio climático
A Xunta de Galicia e o Concello de Lobios están a avaliar vías de colaboración para acometer a mellora da estación depuradora de augas residuais (EDAR) da localidade.
A conselleira de Medio Ambiente e Cambio Climático, Ángeles Vázquez, e a alcaldesa da localidade, Carmen Yáñez, estudaron, nunha reunión que mantiveron esta tarde, o proxecto municipal para mellorar o tratamento das augas residuais. Así, tal e como explicou a rexedora, entre outras actuacións, sería preciso instalar unha grella de difusores no fondo do reactor que permita unha maior homoxeneidade da aireación así como unha sonda de osíxeno para un maior aforro enerxético.
A maiores, tamén se propón a posta en marcha dun autómata, que, ademais de permitir un maior control dos equipos, facilitaría unha posterior conexión en remoto para poder actuar sen necesidade de desprazarse ata a estación, co que se reduciría a pegada de carbono e se aforrarían custos de desprazamento. Pola súa banda, Ángeles Vázquez trasladoulle á alcaldesa que o persoal técnico de Augas de Galicia analizará o estudo que remitirá o concello para valorar posibles vías de actuación.
A maiores, a conselleira lembrou que o orzamento de Augas de Galicia sobe o vindeiro ano 2025 preto dun 5%, ata os 144 M€, para seguir optimizando o saneamento e o abastecemento coa mellora de infraestruturas, a formación e divulgación e a execución de políticas activas de resposta ao cambio climático.
O obxectivo principal será facer un uso eficiente da auga e reducir a pegada hídrica na comunidade mediante investimentos nas redes de saneamento, depuración e abastecemento así como no apoio aos concellos, o deseño de mapas de riscos climáticos ou a creación de corredores verdes para reducir os asolagamentos.
Por último e noutra orde de asuntos, conselleira e alcaldesa tamén analizaron varios proxectos relacionados co Parque Natural Baixa Limia-Serra do Xurés e concretamente, as propostas municipais para poñer en valor núcleos emblemáticos deste espazo natural localizados no concello de Lobios.
