- O conselleiro de Presidencia, Xustiza e Deportes, Diego Calvo, formalizou hoxe na Coruña a cesión das dependencias, que se consolidan como buque insignia da cidade neste eido de acción
- O Goberno galego dálle así resposta ás necesidades de espazo dos distintos colectivos ao tempo que garante a prestación dos servizos á cidadanía nas mellores condicións
O conselleiro de Presidencia, Xustiza e Deportes, Diego Calvo, xunto coa delegada territorial da Xunta na Coruña, Belén do Campo, formalizou hoxe a entrega de 12 locais do Espazo Amizar a 14 entidades con sede na Coruña que traballan no eido sociosanitario. Trátase dos colectivos beneficiarios da convocatoria publicada o pasado maio e cuxa resolución se publica hoxe no Diario Oficial de Galicia.
A práctica totalidade destas entidades xa resultaran beneficiarias na anterior adxudicación, feita no verán de 2022. Trátase de Asociación de Colaboración y Promoción del Sordo (Acopros), Fundación Abrente, Club Deportivo Inclusivo Enki, Asociación Acción Solidaria Galicia (Asdegal), Liga Reumatolóxica Galega Loita contra o Reumatismo (Ligal), Asociación de Familiares de Enfermos de Alzheimer e Demencias Fines da Coruña (Afaco), Fundación Salma, Asociación Galega de Lupus, Fundación Ingada, Asociación Juvenil Atlántica, Asociación Galega de Esclerose Lateral Amiotrófica (Agaela), Asociación Galega de Familias de Acollida (Acougo) e Círculo de Mediación de Galicia (Cimega). Xunto a elas instalarase tamén no terceiro andar do edificio a Asociación Galega de Fibrose Quística.
Segundo sinalou o conselleiro Diego Calvo, a posta á disposición dos locais ao servizo das entidades sociosanitarias enmárcase no compromiso da Xunta co labor que desenvolve cada unha delas e, en xeral, co tecido asociativo da Coruña. O Goberno galego quere con esta medida darlles resposta ás necesidades de espazo que viñan rexistrando os colectivos e facilitarlles así un maior crecemento e impulso aos seus proxectos. A cesión ten un prazo de catro anos e supón a consolidación do Espazo Amizar como “buque insignia da cidade no ámbito sociosanitario”.
Investimento de cinco millóns de euros
Con arredor de 6.000 metros cadrados, o edificio da Xunta bautizado como Espazo Amizar naceu da reforma da antiga sede de Sanidade na cidade coruñesa. As obras supuxeron un investimento de sete millóns de euros para acoller, entre outras dependencias, unha oficina de emprego, oficinas administrativas da Xunta e estes locais do terceiro andar para organizacións sanitarias e sociais sen ánimo de lucro. Dotouse así a cidade dun novo espazo administrativo recuperando un edificio para a veciñanza e poñendo en valor o patrimonio público.
Tal e como indicou Diego Calvo, a vontade de servizo público coa que rexurdiron as instalacións levou o Goberno galego a reservar doce locais para entidades do eido sociosanitario. A adxudicación produciuse a través dun concurso público. A iniciativa busca tamén garantir a prestación dos servizos nas mellores condicións, tanto para o persoal como para a cidadanía.
O Goberno galego dálles así resposta ás necesidades de espazo dos colectivos locais, ao igual que fai no edificio administrativo de Benito Corbal en Pontevedra.
