O rexedor trasládalle a Ángeles Vázquez a súa intención de solicitar as axudas do IGVS para rehabilitar unha antiga escola municipal e destinala a vivendas de alugueiro social
A Xunta de Galicia estudará a posibilidade de colaborar co Concello de Vilasantar para levar a cabo a humanización da contorna do albergue de peregrinos da Laxe co obxectivo de habilitar no mesmo un novo espazo de ocio e lecer á disposición tanto dos usuarios da instalación como da veciñanza.
Así llo trasladou a conselleira de Medio Ambiente, Territorio e Vivenda, Ángeles Vázquez, ao rexedor coruñés, Fernando Pérez, no marco da reunión que mantiveron esta semana para falar de diversos asuntos de interese municipal.
En concreto, o alcalde explicoulle que o Goberno local acaba de rematar os traballos de rehabilitación da Casa Reitoral da Laxe, reconvertida nun albergue de peregrinos con 30 prazas e que estará operativo a partir desta Semana Santa.
O proxecto municipal pasa por humanizar a contorna do edificio, localizado á beira do río Cabalar e onde se pretende crear unha nova zona de esparexemento tanto para os peregrinos coma para os veciños de Vilasantar a través da rehabilitación paisaxística integral dun espazo de 2.000 metros cadrados. Con esta actuación, segundo explicou o alcalde, mellorarase o valor ambiental e a accesibilidade a esta contorna fluvial de gran valor ambiental e turístico, incorporando nova vexetación autóctona, unha pasarela de madeira, mobiliario urbano, luminarias e unha pequena praia fluvial.
Pola súa banda, a conselleira trasladoulle que a Dirección Xeral de Ordenación do Territorio e Urbanismo analizará o contido da memoria remitida polo Concello co fin de valorar a súa posible implicación técnica e económica no proxecto.
Neste sentido, lembrou que desde hai 12 anos a Xunta mantén aberta a través do plan Hurbe unha liña de apoio económico ás entidades locais en iniciativas que, como esta, contribúen á mellora dos equipamentos municipais e dos servizos á disposición da veciñanza, así como á humanización e posta en valor de contornas urbanas.
Así mesmo, o rexedor trasladoulle tamén que o Concello de Vilasantar quere rehabilitar unha antiga escola municipal co fin de destinala a vivendas de alugueiro social para os seus veciños, unha iniciativa para a que solicitará a colaboración do IGVS a través da liña de axudas habilitada a tal fin. De feito, a conselleira lembroulle que a convocatoria se publicou o pasado mes de febreiro e permanecerá aberta ata o 1 de xuño.
Por último, Fernando Pérez aproveitou a reunión para presentarlle á conselleira unha iniciativa municipal orientada á xestión dos biorresiduos, obrigatoria para este concello a partir do 31 de decembro de 2023. En concreto, referiuse á implantación da chamada agrocompostaxe a través da cal se tratan os residuos orgánicos municipais xunto con agrarios, un proxecto para o que solicitou tamén apoio xurídico á Consellería.
