- José González destacou a Estratexia Mocidade Activa que inclúe apoios á contratación como os programas Investigo (4,8 M€), o de primeira experiencia profesional (6,3 M€) ou o Galicia Emprega Moz@s (3,5 M€)
- Salientou a vocación emprendedora da comunidade galega, que desenvolve accións ligadas ao territorio como o proxecto Fixar, que potencia o modelo dos colivings para atraer emprendedores e se enmarca na estratexia global galega neste eido
- Puxo en valor a contribución dos autónomos á economía galega e o apoio do Executivo galego a este colectivo cunha orde única de axudas de máis de 40 M€
- Mencionou distintas accións do Goberno autonómico para casar oferta e demanda laboral, impulsando tanto a atracción de talento interno como foráneo, entre elas os apoios ao retorno emprendedor dotados este ano con 1M€ e publicados hoxe no DOG
O conselleiro de Emprego, Comercio e Emigración, José González, puxo hoxe en valor a aposta do Goberno galego a prol da empregabilidade da mocidade, tanto por conta propia como allea, con medidas ligadas ao territorio e enfocadas a reter o seu talento. Entre elas, destacou a Estratexia Mocidade Activa dotada con 20M€ desde a Consellería de Emprego, Comercio e Emigración e que inclúe apoios á contratación como o programas Investigo, lanzado este martes e dotado con máis de 4,8 M€, o de primeira experiencia profesional (6,3 M€) ou o Galicia Emprega Moz@s (3,5 M€), este último dentro do Galicia Emprega e con apoios que se poden solicitar desde este venres.
Así o destacou durante a gala da XIX edición do Premio Joven Empresario/a e Iniciativa Emprendedora de AJE Vigo, á que tamén asistiron o secretario xeral de Emprego e Relacións Laborais, Pablo Fernández e a delegada territorial da Xunta en Vigo, Ana Ortiz. Alí tamén salientou a vocación emprendedora da comunidade galega, que desenvolve accións ligadas ao territorio como o proxecto Fixar, que o Executivo autonómico seguirá impulsando este ano cunha segunda edición para continuar potenciando o modelo dos colivings co fin de atraer emprendedores en Galicia. Esta é unha das múltiples medidas encadradas na estratexia global de emprendemento á que se destinarán máis de 32 M€ neste exercicio.
Ademais, engadiu o conselleiro, Galicia seguirá favorecendo as sinerxías entre as oficinas de emprego e a rede de polos para aproveitar o talento da mocidade, tanto por conta propia como por conta allea. Neste sentido, puxo de relevo o papel de entidades como AJE Galicia e AJE Vigo e felicitou ás persoas candidatas e ás premiadas na gala de hoxe.
Ao mesmo tempo, trasladou o apoio do Goberno galego para facilitar o labor do tecido empresarial que contribúe á evolución do mercado laboral na comunidade. Un mercado laboral no que, segundo reflicten os últimos datos a Enquisa de Poboación Activa (EPA), se rexistra máis emprego entre a mocidade ao aumentar en 7.100 as persoas empregadas menores de 30 anos e no que a taxa de paro xuvenil continúa sendo menor en Galicia (18,1 puntos) que no conxunto do Estado (19,1 puntos).
O titular de Emprego tamén puxo en valor a contribución dos autónomos á economía galega e o apoio da Xunta a este colectivo cunha orde única de máis de 40 M€ coas axudas específicas para a súa actividade e que se poden solicitar ata o 30 de setembro.
Captar talento dentro e fóra de Galicia
Ademais, José González referiuse ás distintas medidas para a atracción de talento dentro e fóra da comunidade. En relación ás que se están a potenciar en Galicia, destacou a mellora do Servizo Público de Emprego de Galicia con ferramentas como o software EMi para casar oferta e demanda no mercado laboral co apoio da intelixencia artificial e que se potenciará con accións como unha app móbil, así como a aposta pola flexibilización da formación para adaptala ás necesidades das empresas. A isto engadiu o apoio aos colectivos con maiores dificultades de inserción laboral con iniciativas como a citada Galicia Emprega.
En canto á captación de talento fóra de Galicia, o conselleiro explicou que o Goberno galego pon o foco no retorno dos emigrantes galegos e na súa integración laboral tanto por conta allea como por conta propia. Neste último caso, faino con medidas como os apoios ao retorno emprendedor (1 M€), dos que o Diario Oficial de Galicia publica hoxe a convocatoria. Engadiu ademais que a Xunta tamén colabora con terceiros países na captación de talento, sempre de xeito ordenado e da man das empresas e, con ese fin, na primeira quincena de marzo está prevista a celebración de feiras de emprego na Arxentina e no Uruguai nas que as empresas galegas terán a oportunidade de captar talento en ambos países.
