Xosé Merelles presentou xunto co director da Casa de Galicia de Madrid, Luis Ramos, o libro que narra a ruta xacobea desde a perspectiva dun dos grandes da literatura galega
O director de Turismo de Galicia, Xosé Merelles, puxo en valor esta tarde a experiencia e a perspectiva do Camiño de Santiago narrada por un dos grandes da literatura galega como foi Álvaro Cunqueiro. Xosé Merelles presentou na Casa de Galicia de Madrid a obra “El Camino de Santiago. El libro olvidado de 1965 de Álvaro Cunqueiro”, da editorial Alvarellos, impulsada polo Goberno galego para enriquecer a biblioteca sobre temas do Camiño. No acto tamén participou o director da Casa de Galicia, Luis E. Ramos.
Durante a súa intervención, o director de Turismo de Galicia destacou a importancia e transcendencia da ruta xacobea que non só moveu a milleiros de peregrinos a través dos tempos senón que logrou convencer a institucións e gobernos da necesidade da súa promoción, impulsando o desenvolvemento económico e territorial das comunidades e países polos que pasa.
Subliñou que precisamente a publicación inicial desta obra de Cunqueiro en 1965 foi para divulgar o Camiño de Santiago co gallo da celebración daquel ano santo, efeméride “que reorientou a motivación dos peregrinos” ao sumar, por primeira vez, outras razóns de carácter cultural e turísticas.
Ademais, aquel ano realizáronse numerosas obras para mellorar o Camiño e os monumentos dos seus arredores e para aloxar aos peregrinos, inaugurándose a primeira infraestrutura de acollida en Santiago para peregrinos.
