- Con estas actuacións, realizadas a través da Rede de polos de emprendemento, o Goberno galego busca promover fórmulas de emprendemento social e autónomo que contribúan a xerar emprego de calidade e a fixar emprego no rural
- Entre os meses de xullo e agosto hai programadas máis de 20 accións de formación e para promover redes de colaboración neste eido e entre as máis recentes destaca o obradoiro para interpretar datos de alcance e vendas co fin de optimizar o negocio
- As 15 oficinas da Rede de polos levan atendido preto de 4.600 experiencias de emprendemento desde o nacemento desta iniciativa en xullo de 2022 e que contribuíu ao recoñecemento de Galicia como Rexión Emprendedora Europea 2025
A Rede de polos de emprendemento da Consellería de Emprego, Comercio e Emigración promoveu no primeiro semestre deste ano máis de 160 accións de formación e actividades para promover alianzas no eido do emprendemento. Nelas inclúense obradoiros, accións de difusión da cultura emprendedora e outras para potenciar o emprendemento cos recursos locais, entre outras. Con estas actuacións o Goberno galego busca impulsar, a través das 15 oficinas da rede de polos distribuídas por toda Galicia, fórmulas de emprendemento social e autónomo que contribúan a xerar emprego de calidade e a fixar emprego no rural.
Ademais, en relación coas deste verán, entre os meses de xullo e agosto hai programadas máis de 20 accións de formación e para promover redes de colaboración, que se sumarán ás realizadas entre xaneiro e xuño. En concreto, no mes de xullo desenvolvéronse actividades relacionadas con temáticas como coa marca do territorio e o sector vitivinícola, co fomento de redes de contactos no sector artesán, talleres de divulgación da cultura emprendedora e xornadas informativas sobre as ferramentas da administración galega para apoiar o emprendemento ligado ao territorio. Tamén accións relacionadas co emprendemento feminino e sesións de divulgación sobre emprendemento cooperativo.
Exemplos
Como exemplo das máis recentes destaca o obradoiro organizado a finais de xullo pola Rede de polos en colaboración co Centro de Orientación ao Emprendemento de Galicia (COE) -lugar que acolleu a actividade- e o Cluster do Ecommerce galego no que se impartiron contidos para interpretar datos de alcance e vendas co fin de tomar as decisións máis axeitadas para o negocio.
En relación a este mes de agosto, ademais das realizadas para incentivar o espírito emprendedor, están previstos talleres prácticos de difusión da cultura emprendedora en obradoiros de emprego o 21 e o 27 de agosto e o 31 de agosto relacionada co talento cooperativo. As persoas interesadas nestas actividades poden consultar todos os detalles nesta ligazón ao calendario de eventos e actividades de difusión que se irá actualizando coas que se vaian programando para o resto do ano.
A Rede de polos
A Rede de polos —actuación clave no recoñecemento de Galicia como Rexión Emprendedora Europea 2025— forma parte da aposta estratéxica do Goberno galego polo emprendemento ligado ao territorio, eido ao que destina máis de 32M€ este ano. Actualmente conta con 15 oficinas activas, espalladas por todo o territorio e cun gran foco no rural: tres na provincia da Coruña (Ferrol, Coristanco e Melide), cinco na provincia de Lugo (Friol, Mondoñedo, Sarria, A Fonsagrada e Monforte de Lemos); catro na provincia de Ourense (O Carballiño, Baños de Molgas, O Barco de Valdeorras e Verín); e tres na provincia de Pontevedra (Silleda, O Porriño e Vilanova de Arousa). En global, xa se atenderon en todas preto de 4.600 experiencias de emprendemento.
