— A obra enmárcase no Plan Hurbe, un programa impulsado polo Goberno galego hai 12 anos e ao que xa destinou case 150 M€ para cofinanciar preto de 320 actuacións
— Ángeles Vázquez garante que manterá a súa cooperación cos concellos co fin de obter mellores espazos públicos, vilas máis accesibles e contornas humanizadas
A conselleira de Medio Ambiente, Territorio e Vivenda, Ángeles Vázquez, visitou esta mañá o concello de Triacastela para comprobar o resultado da humanización executada na contorna da antiga ferrería, que serve de entrada ao pobo e tamén de saída do Camiño Francés por San Xil, grazas a un convenio de colaboración entre a Xunta de Galicia e o Concello.
Acompañada pola alcaldesa Olga Iglesias, a responsable autonómica explicou que o investimento realizado ascendeu a 49.917,03 euros, dos cales uns 35.000 euros foron achegados polo seu departamento e os outros 15.000 euros, pola Administración local.
Este ano, a Xunta continuará colaborando economicamente cos concellos para levar a cabo actuacións coma esta. A tal fin, segundo avanzou a conselleira, reservaranse 7 millóns de euros para proxectos que contribúan a habilitar ou mellorar equipamentos públicos municipais e poñan en valor as contornas urbanas das vilas galegas.
O proxecto executado en Triacastela tiña como fin acadar unha humanización integral da marxe dereita da avenida Camilo José Cela, localizada nas proximidades do Camiño de Santiago e na contorna da antiga ferrería. Para logralo, acometeuse a pavimentación en pedra da zona, dotándoa ademais de beirarrúas amplas e seguras, e colocáronse muros de mampostería en sintonía coa contorna e primando os materiais propios da zona para xerar un impacto visual positivo.
Tamén se levou a cabo unha mellora dos servizos existentes, coa renovación do alumeado público, a substitución da rede de pluviais, a remodelación do firme e a instalación de nova sinalización. Así mesmo, unha das actuacións máis visibles consistiu na execución dunha escaleira de acceso desde o ramal 1 cara á zona peonil da avenida.
Un programa xa consolidado
Cómpre lembrar que a actuación acometida no concello de Triacastela enmárcase no chamado Plan Hurbe, un programa impulsado pola Xunta hai xa 12 anos co obxectivo de axudar ás entidades locais a executar distintos tipos de proxectos urbanísticos destinados á creación, mellora e humanización de infraestruturas de uso público e colectivo.
Neste sentido, Ángeles Vázquez subliñou que ese esforzo de cooperación entre a Xunta e os municipios galegos se traduciu ata o de agora nun investimento de preto de 150 millóns de euros por parte do Goberno galego, grazas aos cales xa se cofinanciaron en toda Galicia case 320 actuacións urbanísticas.
Estas cifras avalan o éxito e a consolidación do programa, como subliñou a conselleira, que garantiu que o seu departamento manterá esta liña de cooperación cos concellos para poñer á disposición dos cidadáns mellores espazos e servizos públicos, vilas máis accesibles e contornas urbanas humanizadas e máis acolledoras.
Por último, tamén a alcaldesa de Triacastela subliñou a importancia deste tipo de actuacións para os concellos galegos, que no seu caso concreto permitiu humanizar a entrada ao pobo e á vez, “dotar de servizos” ás vivendas da zona. “Creo que as persoas que pasen por Triacastela de camiño a Santiago van levar un recordo moito mellor do noso pobo grazas a esta intervención nas inmediacións da avenida Camilo José Cela e no coñecido como Camiño Vello”, declarou.
