— O vicepresidente segundo da Xunta, Diego Calvo, e a delegada territorial da Xunta en Ferrol, Martina Aneiros, presentaron hoxe o proxecto que permitirá reducir a emisión de dióxido de carbono a través de melloras na climatización, na iluminación e coa instalación de paneis solares
— A maiores, o Goberno galego leva investido desde 2015 case 17M€ nos seus edificios administrativos en melloras encamiñadas a reducir o consumo enerxético e mellorar as condicións de traballo dos empregados públicos e a calidade do servizo á cidadanía
— Diego Calvo incidiu na implicación da Xunta coa comarca ferrolá coa aprobación do Pacto de Estado por Ferrol e o cumprimento dos compromisos que son competencia da Administración autonómica
O vicepresidente segundo e conselleiro de Presidencia, Xustiza e Deportes, Diego Calvo, presentou hoxe xunto coa delegada territorial da Xunta en Ferrol, Martina Aneiros, as obras previstas na delegación territorial do Goberno galego en Ferrol coas que mellorar a súa eficiencia enerxética. A Xunta vén de publicar na Plataforma de Contratos Públicos a licitación destas actuacións por un importe de máis de 873.300 euros. As actuacións serán financiadas cos fondos europeos Feder Galicia 2014-2020.
Os traballos, que se prevé que comecen o próximo mes de novembro, inclúen a instalación de 2 bombas de calor aerotérmicas en substitución da actual por absorción e do compresor de gas natural, así como a renovación das luminarias actuais por outras de tecnoloxía LED máis eficientes. Ademais, instalaranse 16 paneis solares na terraza do edificio que permitirán xerar a través da enerxía fotovoltaica para autoconsumo 7.599 quilovatios ao ano e, ao mesmo tempo, reducir en dúas décadas en 59 toneladas o dióxido de carbono á atmosfera. Tamén se colocarán estruturas metálicas para dar soporte aos paneis fotovoltaicos, aos paneis acústicos ou ás máquinas de climatización.
Diego Calvo lembrou que esta obra se enmarca na aposta da Xunta por modernizar e acondicionar as infraestruturas destinadas á prestación de servizos públicos con actuacións como as levadas a cabo nos últimos anos noutros edificios da Administración autonómica que permiten reducir o consumo de enerxía e dotar o persoal e a cidadanía de mellores medios. De feito, desde 2015 o investimento da Administración autonómica en melloras de eficiencia enerxética dos seus edificios administrativos achégase aos 17 millóns de euros, a maiores deste proxecto en Ferrol e o previsto para a delegación territorial da Coruña.
Renovación e modernización
En definitiva, trátase de continuar avanzando na modernización e renovación das infraestruturas administrativas da Xunta e na posta en marcha de novas tecnoloxías coas que obter importantes aforros económicos e de enerxía, ao reducirse a emisión de CO2 e o consumo de quilovatios.
O vicepresidente segundo da Xunta engadiu que o proxecto de eficiencia enerxética na delegación territorial en Ferrol que atende unha vintena de concellos supón unha mostra máis do compromiso do Goberno galego coa comarca ferrolá. Nesta liña, fixo tamén balance das medidas incluídas no Pacto de Estado por Ferrol que, por parte da Xunta, inclúen actuacións como a ampliación do novo hospital, melloras nas infraestruturas viarias para mellorar as conexións entre os concellos da zona ou a posta en marcha do novo albergue de peregrinos na Casa do Mar. O obxectivo de continuar a mellorar os servizos públicos en Ferrol consolidouse cun investimento da Xunta o ano pasado por riba dos 80 millóns de euros ademais de apoiar proxectos que axuden a impulsar a industria.
Por iso, Diego Calvo sinalou a necesidade de que o Goberno central se pronuncie sobre a súa adhesión ao Pacto por Ferrol e sitúe entre as súas accións prioritarias as áreas que son da súa competencia como a construción naval ou en materia ferroviaria.
