O circuíto retoma esta fin de semana a actividade programada en colaboración cos concellos
A Xunta promove ata xuño sete actuacións escénicas en Oleiros e Betanzos, no marco da programación da Rede Galega de Teatros e Auditorios (RGTA). Os espectáculos organizados en colaboración cos concellos desenvolveranse no Auditorio Gabriel García Márquez de Oleiros, con catro pezas, e na Aula Municipal de Cultura de Betanzos, con tres. A carteleira con todas as funcións e horarios pódese consultar en Cultura de Galicia e no web da Axencia Galega das Industrias Culturais (Agadic).
Oleiros acolle mañá Invisibles, de Redrum Teatro, na que colabora en coprodución o Centro Dramático Galego. Trátase dunha adaptación do libro homónimo da xornalista Montse Fajardo que relata casos reais de violencia de xénero sufridos por sete mulleres galegas. O día 20 deste mes exhibirase a obra de Shakespeare Medida x Medida, da man de Producións Teatráis Excéntricas, e o 27, Bravas, un espectáculo unipersoal de Isabel Risco no que ofrece a súa particular visión da historia das mulleres galegas.
Xa en abril, o día 10, terá lugar a función de A lingua das bolboretas, de Sarabela Teatro, na que o espectador será testemuña do proceso de aprendizaxe que emprende o protagonista da man do mestre de escola, así como da traxedia que supuxo vivir con medo e do cru impacto do estoupido dunha guerra civil.
Funcións en Betanzos
Pola súa banda, Betanzos retoma a programación tamén mañá con SÓS, de Malasombra Producións, unha reflexión sobre a vellez, a convivencia e a soidade que sofren moitas persoas maiores, a través da historia de dous octoxenarios que se ven na obriga de compartir piso. En abril, o día 17, chega a este concello Running, unha peza cómica de De Ste Xeito Producións que parodia a ocupadísima vida actual e afonda na posibilidade que pode ter o amor nesa dinámica.
O 29 de maio será a quenda de La Quintana, con O premio, unha comedia sobre a situación que viviremos nun futuro próximo derivada do progreso tecnolóxico e a loita cara ao éxito económico, sentimental e social.
Máis de 300 actuacións en 40 concellos
Deste xeito, a Rede Galega de Teatros e Auditorios retoma a actividade, suspendida nas últimas semanas por mor das restricións da covid-19, como programa cultural máis intenso e extenso de todos os promovidos pola Xunta. Cómpre salientar que a programación total deste primeiro semestre ofrece máis de 300 actuacións musicais e escénicas en 40 concellos da Rede, coa participación de 110 formacións artísticas profesionais. Mobilízanse así contratacións por un valor aproximado dun millón de euros, cofinanciados entre a Xunta e os concellos asociados.
