— Kings of Lions, Bryan Adams, Duki e outros grandes grupos actuarán no marco do festival ‘O Son do Camiño’
— O Gozo Festival incluirá os concertos de Franz Ferdinand, Leny Kravitz, Alanis Morrissette, Lionel Richie, Chayanne, Leyva, David Guetta e Anastacia
A Xunta de Galicia presentou este venres a súa programación de concertos e grandes festivais que terán lugar este 2025 nas principais cidades galegas como reforzo da oferta de turismo urbano da Comunidade. Así o puxo de manifesto o director de Turismo de Galicia, Xosé Merelles, na presentación de ‘Concertos do Xacobeo’, a marca coa que pretende unificar a programación de música, espectáculos e ocio co obxectivo de convertela en atractivo turístico.
Durante a súa intervención, Xosé Merelles referiuse a citas que son xa habituais nas axendas dos afeccionados da música en directo como os festivais O Son do Camiño, o Morriña Festival, o Resurrection ou o A Coruña Sounds.
A aposta por este tipo de eventos musicais xunto con outras accións como concertos de grandes artistas, fai que Galicia poida contar este 2025 con solistas, bandas e grupos internacionais da talla de Kings of Lions, Bryan Adams, Duki, que actuarán en Santiago de Compostela no festival O Son do Camiño.
Franz Ferdinand, Leny Kravitz, Alanis Morrissette, Lionel Richie, Chayanne, Leyva, David Guetta e Anastacia forman parte da programación do Gozo Festival en A Coruña e Vigo.
Neste sentido, Xosé Merelles salientou a promoción de Galicia que se fai a través destes grandes concertos e festivais que se traduciu na visita en 2023 de máis de 1,6M turistas que acudiron atraídos por estas citas.
