- A xerente da Fundación Artesanía de Galicia, Elena Fabeiro, entregou hoxe o Premio Internacional de Sombreirería Chapeu Contest 2024, que recaeu na revisión dun sancosmeiro tradicional da sombreireira holandesa Amber van Thull
- A reinterpretación do pucho tradicional galego presentada por Marta Estévez, acadou o recoñecemento na categoría Aprendiz
- O Goberno galego patrocina por primeira vez este festival de divulgación da sombreirería co obxectivo de que se afiance como o evento de referencia para os profesionais da sombreirería e dos complementos de moda de Galicia
A xerente da Fundación Artesanía de Galicia, Elena Fabeiro, entregou hoxe o I Premio Internacional de Sombreirería Chapeu Contest, patrocinando pola Xunta. Trátase dunha das principais novidades da edición deste ano do Festival Asnot de Padrón e está dotado con 600 euros. A peza gañadora foi Dancing like the sun (Bailando coma o sol), da sombreireira holandesa Amber van Thull, coa que a autora buscaba reinterpretar un dos nosos sombreiros tradicionais: o sancosmeiro.
A peza gañadora está tecida completamente á man con cinta de palla natural e fíos de poliéster, rematada cunha capa de resiña especial que lle dá rixidez e a impermeabiliza e adornada con penachos de trigo seco.
Co lema Re-visita con mirada presente, o Chapeu Contest pretende convidar a profesionais e afeccionados a reinterpretar un sombreiro vinculado ao traxe tradicional galego – un sancosmeiro, unha monteira ou un pucho – co obxectivo de revalorizar estes sombreiros tradicionais e de traelos á actualidade. Na categoría Aprendiz, distinguiuse o traballo de Marta Estévez que reinterpretou un pucho tradicional galego a través da súa peza Patipucho.
Asnot 24
A Xunta colabora por primeira vez na celebración do Festival Asnot de Padrón, un evento centrado na divulgación do sombreiro a partir da retranca, do humor e do enxeño, co obxectivo de que se afiance como o evento de referencia para os profesionais da sombreirería e dos complementos de moda de Galicia.
Ademais do Premio Chapeu Contest, a Fundación Artesanía de Galicia colabora na organización do II Chapeu Market, un mercado de sombreirería que se celebra hoxe no Paseo do Espolón, en horario de 11,00 a 21,30 h. Neste mercado participan tres profesionais da marca Artesanía de Galicia: os sombreireiros Félix de Martín (Ourense) e Julia Vilariño (Pontedeume), e a cesteira María Isabel Liñares Recimil (Silleda), especializada en labores de palla.
Outra das novidades da edición deste ano, que contou coa colaboración da Xunta, foron as Xornadas Profesionais de Sombreirería. Tradición e contemporaneidade, que se celebraron na Casa Museo Rosalía de Castro, os días 22 e 23 de xullo.
