Ángeles Vázquez lembra que a LOUGA supuxo “un antes e un despois” na regulación desta materia xa que os PXOM que se adaptaron a ela acadaron uns parámetros de calidade moi superiores aos anteriores
Salienta a posta en marcha doutras iniciativas como os plans básicos municipais para dotar os concellos de menos de 5.000 habitantes dun instrumento de planeamento simplificado
A Xunta reitera o seu compromiso para que Galicia sexa un exemplo de urbanismo responsable e sostible, tal e como salientou hoxe a conselleira de Medio Ambiente, Territorio e Vivenda, Ángeles Vázquez, quen tamén puxo en valor os avances realizados no uso racional do territorio.
Durante a inauguración da xornada técnica 20 anos da LOUGA. O urbanismo do século XXI, na que estivo acompañada pola directora xeral de Ordenación do Territorio e Urbanismo, Encarnación Rivas, a conselleira lembrou que esta normativa supuxo “un antes e un despois” na regulación desta materia xa que os plans xerais de ordenación municipal (PXOM) que se adaptaron a ela acadaron uns parámetros de calidade moi superiores aos anteriores.
Este traballo a prol de acadar o obxectivo de “ningún concello sen PXOM” continuou coa Lei do solo do ano 2016 que, segundo dixo Ángeles Vázquez, foi “transcendental” para axilizar o procedemento xa que redefiniu o solo de núcleo rural, unificou os trámites ambientais e urbanísticos, centralizou a solicitude de informes sectoriais autonómicos na Dirección Xeral de Ordenación do Territorio e Urbanismo e estableceu un prazo único de tres meses con silencio positivo.
Nesa liña, logo de explicar que na actualidade Galicia conta con 114 PXOMs adaptados á lexislación vixente, que garante un “urbanismo seguro, equilibrado e ordenado”, a conselleira explicou que a Xunta tamén puxo en marcha outras iniciativas como os plans básicos municipais para dotar os concellos de menos de 5.000 habitantes dun instrumento de planeamento simplificado, pero suficiente.
A maiores, o Goberno galego impulsou a xunta consultiva en materia de ordenación do territorio e urbanismo, cuxo obxectivo é emitir informes a solicitude dos concellos e dos axentes económicos e sociais. De feito, que se constituíu o pasado mes de xullo, xa ditou circulares interpretativas en materias dubidosas grazas á cooperación entre entidades.
Para concluír, a conselleira puxo de manifesto a “necesidade urxente” de aprobar por parte do Goberno central unha modificación do Real Decreto Lexislativo 7/2015 polo que se aprobou o texto refundido da Lei de solo e rehabilitación urbana para “garantir a seguridade xurídica dos planeamentos” evitando a anulación ex nunc dos mesmos e, polo tanto, que se permita a conservación dos actos administrativos aínda que se anule un PXOM.
