— Ángeles Vázquez indica que esta iniciativa, que é desenvolvida pola Universidade da Coruña con financiamento do Goberno galego, permitirá ofrecer datos clave para abordar a creación destes dous novos instrumentos
— Alfonso Villares incidiu na importancia do Plan da Cultura Marítima como ferramenta pioneira e dinamizadora que se está a desenvolver no territorio galego
A Xunta salienta que o futuro Censo do patrimonio marítimo se converterá nunha ferramenta clave para a elaboración do catálogo de bens de valor cultural no litoral galego e da rede de establecementos turísticos, ambos previstos no articulado da Lei de ordenación e xestión integrada do litoral de Galicia (Loxilga).
Durante a reunión que mantiveron hoxe a conselleira de Medio Ambiente e Cambio Climático, Ángeles Vázquez, e o conselleiro do Mar, Alfonso Villares, co director do Plan da Cultura Marítima (PCUMA) de Galicia-Horizonte 2030, Óscar Fuertes, salientouse que esta iniciativa da Consellería do Mar, elevada a Consello da Xunta do 7 de setembro de 2023, supón un instrumento de grande utilidade para garantir a conservación e promoción do patrimonio marítimo-pesqueiro da Comunidade.
Nesa liña, Ángeles Vázquez explicou que a Loxilga incide en que as administracións públicas promoverán a protección, conservación e mellora do patrimonio cultural da costa a través de accións orientadas á súa posta en valor, recuperación e rehabilitación.
Deste xeito, segundo dixo a conselleira, o proxecto avaliado na reunión celebrada hoxe servirá como punto de partida para o desenvolvemento de dúas actuacións estratéxicas incluídas na Lei do litoral galega.
Trátase, por un lado, do Catálogo de bens de valor cultural na costa, un dos elementos que deberá desenvolverse ao abeiro da norma autonómica, que tamén declara como obxecto de protección específica como parte do patrimonio cultural inmaterial os usos, as representacións, as expresións, os coñecementos e as técnicas das comunidades costeiras que manifestan un particular sentimento de identidade e de relación co medio costeiro e mariño; e por outro, da rede de establecementos turísticos na costa que se creará a partir da recuperación de edificacións preexistentes que destaquen polo seu especial valor arquitectónico, histórico ou cultural.
Pola súa banda, o conselleiro do Mar, Alfonso Villares, salientou que o Plan da Cultura Marítima constitúe unha base sólida sobre a que continuar traballando na misión de preservar e activar a cultura marítima galega, a través de cen propostas de proxectos para a cultura do mar, entre os que se atopa o Censo do patrimonio marítimo. Trátase dun plan pioneiro e innovador, do que non hai precedentes en outros territorios.
