A conselleira de Medio Ambiente e Cambio Climático destaca a importancia de que o Tribunal de Xustiza da UE resolva o antes posible a cuestión prexudicial trasladada polo Tribunal Superior de Xustiza de Galicia sobre a tramitación dos proxectos eólicos
A conselleira de Medio Ambiente e Cambio Climático, Ángeles Vázquez, mantivo hoxe un encontro coa directora de Mercados de Carbono e Mobilidade Limpa da Dirección Xeral de Acción polo Clima da Unión Europea, Beatriz Jordi, na que abordaron a situación do sector eólico en Galicia. A representante do Executivo galego trasladou a necesidade de clarificar e axilizar a tramitación dos proxectos eólicos na comunidade co obxectivo de que poida avanzar no desenvolvemento das enerxías renovables para garantir o abastecemento, a descarbonización e a loita contra o cambio climático.
A responsable autonómica expuxo a situación de inseguridade xurídica que está a xerar en Galicia a actual parálise xudicial e administrativa que afecta a ducias de proxectos eólicos e o interese da Xunta en que o Tribunal de Xustiza de la Unión Europea (TXUE) resolva o antes posible a cuestión prexudicial trasladada a finais de xuño polo Tribunal Superior de Xustiza de Galicia (TSXG). Ángeles Vázquez incidiu en que o pronunciamento xudicial da UE clarificaría e axilizaría os proxectos paralizados na comunidade, ademais de evitar que a inseguridade xurídica se poida estender a outros países con lexislacións sectoriais similares á española.
Precisamente, a titular de Medio Ambiente e Cambio Climático trasladoulle á representante do Executivo comunitario que a Xunta está a tramitar a Lei de administración ambiental simplificada para reforzar a seguridade xurídica tanto desde o punto de vista dos promotores como das administracións públicas e permita axilizar, sempre con plenas garantías, a tramitación de novos proxectos de desenvolvemento enerxético e industrial na comunidade.
O encontro produciuse coincidindo co congreso Avanzando cara á descarbonización do sector marítimo-portuario en España, organizado pola Alianza Net-Zero MAR e que se celebra entre hoxe e o xoves na Coruña. Beatriz Jordi participou no evento para analizar o Impacto da normativa europea sobre o sector do transporte marítimo.