As AECT da Península Ibérica, incluída a da Eurorrexión Galicia-Norte de Portugal, aproban unha declaración conxunta con medidas como a posta en marcha dun Estatuto do Traballador Transfronteirizo, unha maior descentralización dos fondos europeos e o reforzo do orzamento para a cooperación territorial
As AECT ibéricas, entidades xurídicas únicas no marco institucional da Unión Europea (UE), aprobaron esta semana unha declaración conxunta no III Encontro de AECT Ibéricas celebrado en Vigo e no que participou o conselleiro de Presidencia, Xustiza e Deportes, Diego Calvo.
Deste xeito, reivindican que as AECT son instrumentos eficaces para acadar unha Europa máis cohesionada e próxima á cidadanía. De feito, permiten traducir a integración europea en resultados tanxibles para a cidadanía ao promover a mobilidade sostible, servizos públicos compartidos, a xestión de recursos naturais e, entre outros exemplos de colaboración, a cooperación transfronteiriza en emerxencias.
O Encontro AECT Ibéricas estivo organizado pola AECT Eurorrexión Galicia-Norte de Portugal, unha das entidades asinantes da declaración xunto coa Eurorrexión Pirineos Mediterráneo; Eurorrexión Nova Aquitania Euskadi Navarra; Pirineos-Pyrénées; Duero-Douro; Eurocidade Chaves-Verín; AECT Rio Minho; Hospital de Cerdanya; León-Bragança; Zasnet; Eurocide do Guadiana e o Instituto Europeo de Micoloxía. A través deste documento, as AECT ibéricas reclaman un maior recoñecemento na cohesión territorial e a cooperación transfronteiriza.
Nesta liña, as entidades solicitan medidas coas que fomentar o seu impacto e asegurar o seu papel estratéxico no próximo marco financeiro plurianual da UE. Entre as propostas recollidas destaca a posta en marcha dun Estatuto do Traballador Transfronteirizo ou a esixencia dunha maior descentralización dos fondos europeos e o reforzo do orzamento para a cooperación territorial.
Maior colaboración e impacto conxunto
Ademais, co obxectivo de representar e coordinar as distintas agrupacións no ámbito europeo, as AECT ibéricas propoñen crear unha plataforma europea de AECT baixo o auspicio da Comisión Europea, así como a constitución dunha Rede de AECT ibéricas, que permita fortalecer a colaboración e potenciar o impacto conxunto das agrupacións da Península.
Con esta declaración, as entidades asinantes tamén pretenden o seu recoñecemento como instrumento clave de cooperación en programas europeos e que se aplique o regulamento europeo mediante o que as AECT deben ser recoñecidas como puntos de contacto e coordinación para detectar e resolver obstáculos nos territorios europeos. Tamén reclaman a participación na negociación e deseño de estratexias de cooperación entre os Estados membros, garantindo a súa implicación na planificación e xestión conxunta dos recursos compartidos.
