- O DOG publica hoxe a convocatoria de 2025 destas achegas, dotada con 330.000 € para sufragar os gastos de funcionamento das entidades asociativas de cooperativas, sociedades laborais, centros especiais de emprego e de empresas de inserción
- Con elas apóianse ata o 90% dos gastos de funcionamento e o prazo de presentación de solicitudes é dun mes a contar desde mañá
- Na actualidade, Galicia conta con máis de 3.500 entidades —entre cooperativas, sociedades laborais, centros especiais de emprego e empresas inserción—, das que 230 naceron no último ano
O Diario Oficial de Galicia publica hoxe a convocatoria de achegas de 2025 destinadas a sufragar os gastos de funcionamento das entidades asociativas de cooperativas, de sociedades laborais, de centros especiais de emprego e de empresas de inserción. A ela a Xunta destina un total de 330.000 euros e ten como fin dar continuidade e facer efectivo o labor das asociacións e entidades da economía social.
O programa conta con dúas liñas de financiamento. A primeira con 230.000 euros vai dirixida ao fomento e consolidación das asociacións de cooperativas e de sociedades laborais. A segunda, con 100.000 euros, está destinada ás asociacións de centros especiais de emprego e empresas de inserción laboral. En ambos os dous casos apóianse parcialmente (ata o 90%) os seus gastos de funcionamento.
Con estas liñas, a Xunta de Galicia contribúe a consolidar e reforzar o funcionamento das entidades representativas do sector da economía social, coa aposta polo fomento da súa participación aos distintos niveis económicos e sociais e para visibilizar e promover a economía social como motor de crecemento económico sustentable, que crea emprego de calidade, integrador e asentado no territorio.
As entidades interesadas poden cursar as súas peticións desde mañá e ata o próximo 4 de marzo, data na que remata o prazo. Os requisitos e documentación necesaria para presentar as solicitudes poden consultarse na orde que publica hoxe o DOG.
A Economía Social en Galicia
Na actualidade, Galicia conta con máis de 3.500 entidades —entre cooperativas, sociedades laborais, centros especiais de emprego e empresas inserción—, 230 delas nacidas no último ano, que implicaron a preto de 600 novas persoas socias promotoras, a metade mulleres. Ademais, en 2024 a economía social xerou 800 novos empregos.
A estes resultados contribúen axudas como as publicadas hoxe no DOG e outros a prol da competitividade destas entidades como as ordes Aprol Economía Social ou Bono consolida -que publicará proximamente o DOG-, o continuo impulso de actividades formativas e de divulgación ou a rede Eusumo, unha iniciativa con máis dun cento de entidades adheridas e que actúa como xanela única para facilitar información, asesoramento e acceso a axudas europeas, estatais e autonómicas.
Para seguir nesta senda de crecemento, este ano a Xunta dedica á economía social un 2,8% máis que o ano pasado, acadando un investimento bianual entre 2024 e 2025 de máis de 90 millóns de euros.
Ligazón á orde no DOG:
https://www.xunta.gal/dog/Publicados/2025/20250204/AnuncioG0767-140125-0001_gl.html
