A representante do Goberno autonómico destacou que os pais e nais aínda poden solicitar unha das máis de 10.500 prazas ofertadas e que este é o cuarto ano de gratuidade neste tipo de centros en toda Galicia
A delegada da Xunta, Belén do Campo, visitou as escolas infantís da rede Galiña Azul de Malpica (Aldeola) e Ponteceso, acompañada primeiro polo alcalde de Malpica, Eduardo Parga e posteriormente polo alcalde Ponteceso, José Manuel Mato. Nas visitas lembrou que aínda está aberto, ata o 4 de abril, o prazo para solicitar praza nas escolas infantís públicas autonómicas para o vindeiro curso 2025-2026, a publicación da lista de admitidos provisionais será o 6 de maio. A representante do Goberno autonómico informou que os pais e nais poden pedir unha das máis de 10.500 prazas ofertadas en Galicia. En concreto, a escola infantil de Malpica conta 3 unidades con 33 alumnos e a de Ponteceso con catro unidades e 61 alumnos.
Belén do Campo informou que na provincia da Coruña están en funcionamento 8 escolas infantís de titularidade autonómica en grandes cidades e 49 incluídas dentro da rede de Galiña Azul, das cales 9 están localizadas en 8 concellos da comarca de Bergantiños-Costa da Morte, en Laracha, Coristanco, Fisterra, Malpica, Muxía, Ponteceso, Camariñas e Carballo (2)
Nesta liña, a delegada lembrou que Galicia é líder absoluta en escolarización na primeira etapa de educación infantil, cunha ratio que se sitúa por riba do 60% na etapa 0-3 e supera en 12 puntos á media española. Unha medida que, segundo subliñou, “é posible grazas ao compromiso do Goberno galego con esta etapa e a un investimento de máis de 65M€ ao ano, e que permite que máis de 32.000 familias galegas poden aforrar, cada ano, ata 3.000 euros na educación dos seus fillos, grazas a gratuidade de todas as escolas infantís independentemente da súa titularidade, durante oito horas ao día e once meses ao ano. As clases comezarán o 5 de setembro”. Este será o cuarto ano de gratuidade destes centros e explicou que Galicia foi a primeira comunidade en aplicar esta medida.
A Xunta segue reforzando aqueles servizos de conciliación por toda a comunidade que sitúan a nosa comunidade como unha referencia e un modelo a seguir. Mostra disto é o Bono Concilia Familia, que na última convocatoria beneficiou a 15.000 familias; a Tarxeta Benvida, unha axuda directa para que as familias fagan fronte aos gastos polo nacemento dun bebé; ou as preto de 100 casas niño que existen por toda Galicia e que permiten crear un recurso de conciliación en concellos sen escola infantil.
