- O director xeral de Emerxencias e Interior, Santiago Villanueva, visitou o Posto de Mando Avanzado habilitado no Monte do Gozo para garantir a seguridade das persoas asistentes aos concertos que se celebran desde hoxe ata o sábado
- O director de Turismo de Galicia salientou a importancia de eventos coma ‘O Son do Camiño’ para o desenvolvemento turístico e económico da comunidade
O director xeral de Emerxencias e Interior, Santiago Villanueva, visitou hoxe o Posto de Mando Avanzado (PMA) habilitado no Monte do Gozo desde o que se visualizará todo o recinto e accesos ao mesmo e se coordinará o dispositivo de seguridade previsto nos tres días de celebración do festival O Son do Camiño. Na visita estivo acompañado polo director de Turismo de Galicia, Xosé Merelles.
Desde hoxe ata o sábado máis de 1.300 efectivos velarán pola seguridade tanto no propio evento como na incidencia que ten na cidade de Santiago de Compostela ante o fluxo de persoas e vehículos que se vai producir. En concreto, forman parte do dispositivo máis de 500 axentes das forzas e corpos de seguridade, entre eles máis de 80 membros da Policía Autonómica, xunto con Policía Nacional, Garda Civil de tráfico e Policía Local de Santiago. A eles súmanse outros case 775 efectivos de emerxencias, entre voluntarios de Protección Civil, bombeiros de Santiago, servizos sanitarios, medios da Axencia Galega de Emerxencias (Axega) e persoal de seguridade privada.
Responsables de todos estes servizos integraranse no Posto de Mando Avanzado para coordinar os fluxos de entrada e o cumprimento das medidas seguridade no interior e exterior do evento co obxectivo de previr aglomeracións e actuar ante emerxencias sanitarias ou doutra índole que se poidan producir. Santiago Villanueva puxo en valor a importancia da coordinación entre todos estes medios despregados que forman parte dos operativos habituais de eventos deste tipo.
Pola súa banda, o director de Turismo de Galicia salientou “a importancia de eventos coma O Son do Camiño, no marco dos Concertos do Xacobeo que posicionan Galicia como destino turístico de grandes citas musicais” e se converten en activos do desenvolvemento turístico e económico da comunidade.
