Fabiola García sinalou que o Executivo Galego conta con 33 prazas públicas para a atención a maiores deste municipio en diferentes recursos
A conselleira de Política Social e Igualdade, Fabiola García, reuniuse co alcalde de Covelo, Pablo Castillo, para avaliar os recursos de atención a maiores deste concello e acordar novas vías de colaboración neste eido.
Neste sentido, a conselleira de Política Social e Igualdade lembrou que a Xunta de Galicia financia en Covelo máis dunha trintena de prazas públicas de atención a maiores a través de diferentes recursos. Ao respecto, tamén engadiu que o pasado ano se destinaron 135.000 euros para financiar os bonos coidado no fogar deste municipio e que supoñen unha achega directa de 5.000 euros a aquelas persoas que prefiren ser coidadas nos seus fogares por unha persoa da súa contorna.
Así mesmo, Fabiola García sinalou que este municipio forma parte do programa Xantar na casa que ofrece aos usuarios cada día un menú completo e saudable nas súas casas. En concreto recordou que a Xunta de Galicia destina máis de 19.000 euros cada ano para financiar esta iniciativa neste concello.
Fabiola García tamén sinalou a importancia de impulsar novos programas de envellecemento activo e saudable para as persoas maiores, especialmente nos concellos máis rurais de Galicia. Así mesmo, indicou que a Xunta de Galicia segue traballando para garantir a mellor atención dos maiores e impulsar a súa autonomía.
