A conselleira felicitou a todas as participantes no certame e agradeceu o seu labor para lograr unha Galicia máis igualitaria
A conselleira de Política Social e Igualdade, Fabiola García, puxo en valor a importancia do audiovisual como ferramenta de cambio social e promoción da igualdade. Así o sinalou durante a IV gala de entrega dos premios Mulleres no Foco, na que tamén participou o conselleiro de Cultura, Lingua e Xuventude, José López Campos, a directora xeral de Promoción da Igualdade, María Quintiana, e o director da Axencia Galega de Industrias Culturais, Jacobo Sutil.
Estes premios, organizados pola Deputación de Pontevedra e a Asociación de Mulleres Cineastas e de Medios Audiovisuais (CIMA), recoñece o traballo das profesionais do sector audiovisual poñendo o foco nos eidos nos que aínda as mulleres teñen menos representación. Neste sentido, a conselleira sinalou a importancia das mulleres do audiovisual cada día “para producir pezas que nos fan pensar nun futuro en igualdade”.
Durante a súa intervención, Fabiola García felicitou ás tres premiadas e ao resto de participantes, ao tempo que destacou que “o audiovisual é unha ferramenta imprescindible de cambio social”. Tamén lle agradeceu o seu traballo que intenta mudar a mirada que durante moitos anos paso inadvertida no cinema, dándolle o papel que merecen a todas as mulleres que forman e formaron parte del.
Nesta liña, fixo fincapé en que o audiovisual constitúe unha peza fundamental para a concienciación tamén das xeracións máis novas. Por iso mesmo, lembrou que a Consellería de Política Social e Igualdade nos últimos meses está a colaborar con diversas propostas culturais e do audiovisual para dar máis ferramentas para reflexionar e sensibilizar, como é o caso da unidade didáctica da película Matria, en colaboración coa produtora Matriuska, que a Xunta puxo a disposición dos concellos e dos CIMS galegos.
Así mesmo, Fabiola García reiterou o compromiso da Xunta de Galicia para seguir impulsando un audiovisual que sexa instrumento de sensibilización e cambio cultural cara unha sociedade cada vez máis igualitaria. Deste xeito, asegurou que o Executivo galego seguirá traballando para que as mulleres teñan un papel protagonista diante e detrás das cámaras, pero especialmente en todas as esferas da vida.
