- Durante a xestión da comunidade galega, traballouse especialmente na proxección internacional e consolidación da marca
- O acto desenvolveuse no stand de Galicia na primeira xornada de Fitur dixirida ao sector profesional
O director de Turismo de Galicia, Xosé Merelles, realizou o traspaso da coordinación do destino ‘España Verde’ ao conselleiro de Cultura, Turismo e Deporte do goberno cántabro, Luis Martínez Abad. Nun acto, celebrado en Fitur 2025 que contou coa participación do director xeral de Turespaña, Miguel Sanz, Xosé Merelles puxo en valor o conxunto de actuacións coordinadas en 2024 pola Comunidade galega que contribuíron a unha maior proxección internacional e consolidación da marca España Verde.
As comunidades galega e cántabra xunto con Asturias e Euskadi conforman este destino que segundo apuntou o director de Turismo de Galicia “está cada vez mellor situada nas preferencias dos turistas que elixen o norte como un destino peculiar e paradigmático”.
Así, salientou que segundo os últimos datos do Instituto Nacional de Estatística, foron 19,8 millóns de visitantes os que se decantaron por algún dos destinos integrados na ‘España Verde’ durante 2004, o que se traduce nun incremento do 16% de visitantes con respecto a 2023.
Neste sentido, Xosé Merelles destacou a internacionalización da marca con visitantes chegados de Europa, Reino Unido e Estados Unidos atraídos pola paisaxe, o litoral, a gastronomía, o patrimonio natural e arquitectónico e as xentes do norte de España, todos eles atractivos que “outorgan identidade ao destino”.
Axenda Fitur 2025
O traspaso da coordinación da ‘España Verde’ foi un dos actos enmarcados na programación da comunidade galega en Fitur. Neste primeiro día dirixido ao sector profesional, o director de Turismo de Galicia tamén participou nas presentacións de destino e campañas turísticas das deputacións provinciais de A Coruña e Ourense, do Xeodestino As Mariñas. Reserva da Biosferra das Mariñas Coruñesas e tamén de novas ferramentas de utilidade para o sector por parte do Cluster de Turismo de Galicia.
Pola tarde, o director de Turismo de Galicia asistiu ás presentacións da Asociación Camiño do Solpor, de Galicia como destino da World Surf League e da Traslatio virtual e audiovisual’ da Fundación Ruta Xacobeo do Mar de Arousa e Ulla.
