- Galicia vén de rexistrar a cifra de desemprego máis baixa neste mes de toda a serie histórica (1996) con 119.155 persoas, acumulando ademais a 48ª caída interanual de paro na Comunidade
- Cunha caída do paro do -7,64% con respecto a marzo de 2024, Galicia avantaxa o ritmo de España en máis de 2 puntos por riba (-5,39%)
- O paro diminuíu no último ano nas catro provincias, nas sete grandes cidades, en todos os sectores de actividade liderando a caída a construción, o sector primario e a industria
- Tocante ás afiliacións, aumentan con respecto a hai un ano, acadando os 1.079.396 cotizantes
O conselleiro de Emprego, Comercio e Emigración, José González, valorou esta mañá os datos de paro e de afiliacións correspondentes ao mes de marzo, destacando que, con 119.155 persoas, Galicia vén de rexistrar a cifra de desemprego máis baixa neste mes de toda a serie histórica (1996) e acumulando a 48ª caída interanual de paro na Comunidade. Ademais, o paro caeu tanto na evolución mensual (-1,51%) como na anual (-7,64%) a un mellor ritmo que España, situándose como a 2ª CCAA na que máis baixa o paro en termos relativos con respecto ao mesmo mes do ano anterior e avantaxando ao Estado (-5,39%) en máis de dous puntos. Tocante ás afiliacións, aumentan con respecto a hai un ano en 17.801 afiliacións máis, acadando os 1.079.396 cotizantes.
En canto aos colectivos prioritarios, José González subliñou a redución na comparativa anual tanto na cifra de parados de longa duración como na de mulleres desempregadas e persoas paradas menores de 30 anos, rexistrando nos tres casos os mellores rexistros para un mes de marzo desde 2005.
Ademais, en relación a hai un ano, o paro cae nas catro provincias, nas sete grandes cidades e en todos os sectores económicos, liderando a caída o sector da construción (-13,74 %), o sector primario (-13,72%) e a industria (-12,82%).
Tamén cómpre sinalar o aumento na contratación, con cifras á alza tanto na comparativa anual (+4,27%) como intermensual (14,87%), e en ambos casos a un ritmo superior a España.
