_Destaca algúns dos éxitos do Froiz na tempada 2024, como a medalla de bronce da selección española no Team Relay do Campionato de Europa de Ciclocrós celebrado en Pontevedra e á que contribuíron Miguel Rodríguez e Aroa Otero
O secretario xeral para o Deporte, José Ramón Lete Lasa, participou na mañá de hoxe na presentación da tempada 2025 do Grupo Deportivo Supermercados Froiz, apadriñada polo gañador de dúas Vueltas a España e un Tour de Francia, Perico Delgado. O mandatario galego, asegurou que o seu exemplo é o mellor para inspirar aos 22 rapaces e rapazas que “seguirán escribindo a historia dourada do Froiz, considerado como o mellor equipo da historia do ciclismo amateur español”.
No acto de presentación tamén estivo o director de La Vuelta a España, Javier Guillén, que presentou a décimo sexta etapa da ronda española de 2025 que unirá Poio e o Mosteiro Castro de Herville sendo unha das tres etapas galegas do circuíto. Lete Lasa amosou a súa satisfacción polo “enorme protagonismo” que está a ter Galicia na Vuelta nos últimos anos e uniu esta relevancia co bo momento que atravesa o ciclismo galego. Neste sentido, o destacou algúns dos éxitos do Froiz na tempada 2024, como a medalla de bronce da selección española no Team Relay do Campionato de Europa de Ciclocrós celebrado en Pontevedra e á que contribuíron Miguel Rodríguez e Aroa Otero.
Lete Lasa lembrou a Magín Froiz, fundador do equipo ciclista xunto a Evaristo Portela, tristemente falecido en 2022 e asegurou que “onde queira que estea, estará contento de ver como os seus corredores lle seguen rendido homenaxe enriba da bicicleta”. O responsable do Deporte galego tamén comprometeu o apoio da Xunta neste novo curso como xa vén facendo dende 2009, con achegas de preto de medio millón de euros.
