- O director xeral de Emerxencias e Interior, Santiago Villanueva, compareceu hoxe a petición propia no Parlamento para facer balance da actividade da Academia Galega de Seguridade Pública
- O ano pasado publicáronse 277 prazas dos procesos selectivos unitarios de policía local, oficial, inspector e auxiliares de policía local e desde a primeira convocatoria de 2018 seleccionáronse máis dun milleiro de axentes por esta vía
- Na Agasp está a formarse a 17ª promoción de Policía Local con 92 alumnos de 32 concellos e hoxe o DOG publica o curso selectivo para a categoría de oficial
- A Academia seguirá a actualizar os coñecementos do persoal das forzas e corpos de seguridade que traballan en Galicia e dos servizos de emerxencia con medio milleiro de cursos este primeiro semestre
O director xeral de Emerxencias e Interior, Santiago Villanueva, fixo balance esta mañá no Parlamento da actividade da Academia Galega de Seguridade Pública (Agasp), referente da formación do persoal de seguridade pública e de emerxencias en Galicia. Desde 2018, a Xunta, a través da Agasp, realiza os procesos selectivos unitarios do persoal de Policía Local coa selección neste período de máis dun milleiro de policías galegos mediante convenios cos concellos que ceden esta competencia no Goberno galego. Así, dos 126 municipios galegos con corpo de Policía Local, 97 deles -incluídas as sete cidades galegas coa recente incorporación de Ourense- encomendan á Academia a selección dos seus axentes, o que supón o 73%.
Na súa intervención, Santiago Villanueva destacou que durante o ano pasado leváronse a cabo procesos selectivos unitarios para as categorías de policía, oficial, inspector e auxiliares de policía local cun total de 277 prazas. Tamén aclarou que na Academia están a formarse actualmente os 92 alumnos de 32 municipios que integran a 17ª promoción de Policía Local e hoxe mesmo publícase no Diario Oficial de Galicia (DOG) o curso selectivo para a categoría de oficial.
O director xeral de Emerxencias e Interior engadiu que a Agasp, ademais dos procesos selectivos, conta cun amplo plan de formación continua tanto no ámbito da seguridade como no das emerxencias. Deste xeito, tal e como aprobou o Consello Reitor da Agasp o pasado febreiro, neste primeiro semestre de 2025 impartiranse medio milleiro de accións formativas, 250 no eido da seguridade pública e outras tantas no das emerxencias.
Segundo o plan presentado no eido da seguridade pública, neste exercicio os axentes da Unidade de Policía Nacional Adscrita de Galicia (UPA), Policía Nacional, Policía Local e Garda Civil dispoñen de case 5.000 prazas para recibir preto de 8.000 horas lectivas en 163 cursos programados en diferentes edicións que suman 250 accións formativas.
Nos contidos dirixidos á Policía Local incídese -aclarou Villanueva- na parte psicolóxica e na formación relacionada con colectivos vulnerables, como menores, vítimas de violencia de xénero e persoas maiores. No caso das actividades dirixidas á Unidade de Policía Adscrita de Galicia (UPA), as sesións van dirixidas ás súas unidades específicas, como o Equipo de Resposta Policial (Erpol) con formación sobre o patrimonio arqueolóxico somerxido, o uso do scooter subacuático ou actualización en materia de furtivismo, entre outros. Contemplase ademais unha formación extensa en materia de violencia de xénero, menores e persoas vulnerables.
A Policía Nacional centra a súa formación na práctica do tiro, na habilitación no uso do Desfibrilador Semiautomático (DESA) e na xestión de conflitos para os seus mandos, mentres que a Garda Civil, estase a formar en violencia de xénero, falar en público ante medios de comunicación, condución, tiro, mobilidade vertical ou piloto de aeronaves non tripuladas entre outra formación.
Pola súa banda, o persoal dos servizos de emerxencias dispón neste primeiro semestre de case 7.500 prazas para realizar preto de 9.000 horas lectivas nas 250 accións formativas programadas para voluntarios de Protección Civil e efectivos dos Grupos de Emerxencias Supramunicipais (GES), así como axentes forestais e ambientais. Inclúese tamén aquí a formación en materia de socorrismo impartida para a inscrición no Rexistro Profesional de persoal socorrista.
Con respecto ao voluntariado de Protección Civil, séguense convocando todos os cursos básicos precisos para cubrir a demanda de acceso a estes colectivos, ademais de seguir cubrindo a demanda formativa do conxunto dos profesionais de emerxencias e de reforzar as accións dirixidas a profesionais do socorrismo.
Na comparecencia de hoxe, o director xeral puxo en valor as instalacións deportivas da Academia coa recente construción dun pavillón deportivo para as clases de educación física ou a pista de atletismo que puxo en marcha a Xunta en colaboración co concello da Estrada da que o alumnado tamén pode facer uso. Por iso, desde hai sete anos estas instalacións son empregadas por federacións deportivas galegas nas súas concentracións oficiais, no marco dun convenio coa Secretaría Xeral para o Deporte.
Co obxectivo de adaptarse os contidos e programas formativos actuais, Santiago Villanueva engadiu que entre as melloras levadas a cabo no recinto creouse un espazo que simula unha vivenda para a práctica de intervencións en inmobles, habilitouse unha aula xudicial para reproducir unha sala de vistas e actualmente estase a construír unha torre de altura para realizar exercicios de rescate.
