A Administración Sanitaria Pública galega agradece o inmenso esforzo e compromiso da totalidade de profesionais, á vez que prega desculpas polo erro puntual cometido na elaboración do listado de traballadores para a vacinación correspondente ao persoal de primeira liña
Dun amplo listado de 2.533 profesionais a vacinar nesta Área Sanitaria nesta fase, vacináronse por erro 17 traballadores -o 0,6 por cento de dito listado- que deberían facelo nunha etapa posterior
No marco do proceso de vacinación do persoal da Área Sanitaria de Pontevedra e O Salnés para previr a incidencia da COVID 19, o Servizo Galego de Saúde quere lembrar que traballa denodadamente por avanzar nesta iniciativa preventiva, a medida que se incorporan máis vacinas por parte do Ministerio de Sanidad, para garantir o maior número posible de efectivos inmunizados nesta área.
Neste senso, a Área Sanitaria de Pontevedra e O Salnés agradece o inmenso esforzo e compromiso da totalidade de profesionais, á vez que prega desculpas polo erro puntual cometido na elaboración do listado de profesionais aos que lles correspondía esta primeira fase de vacinación coma persoal de primeira liña. Deste xeito, recibiron a vacina 17 profesionais -cifra que representa o 0,6 por cento dun listado total de 2.533 traballadores a vacinar-.
En definitiva, do total de 2.533 profesionais, foron 2.516 os que xa se vacinaron e que supoñen preto dun 60% da plantilla da Área Sanitaria, cumprindo estrictamente os criterios establecidos polo Ministerio de Sanidade e o Consello Interterritorial na Estratexia de vacinación fronte a COVID-19 en España. Aínda non se completou a vacinación de profesionais de primeira liña, que rematará cando a Área Sanitaria reciba as correspondentes vacinas
Convocatoria do Comité de Seguridade e Saúde Laboral
Neste senso, a Área Sanitaria de Pontevedra e O Salnés convocará hoxe mesmo ao Comité de Seguridade e Saúde Laboral, para analizar as iniciativas e protocolos internos efectuados no proceso de vacinación das diferentes categorías profesionais.
Finalmente, o Servizo Galego de Saúde agradece o esforzo que está a efectuar a poboación, á que reitera encarecidamente a necesidade do seguimento constante das normas ante a COVID-19: uso de mascarilla, hixiene de mans, distancia de seguridade e ventilación de espazos.
