Nos próximos días dará a coñecer a decisión final sobre quen levará a cabo o proxecto da reforma integral, que conta cun orzamento estimado de máis de 17M€
Os membros do xurado do concurso para a reforma do Pazo de Lourizán recorreron esta semana as instalacións do edificio e a súa contorna para analizar detalladamente in situ os sete proxectos finalistas antes de tomar unha decisión.
Tras dar por finalizada a rolda de visitas, nos próximos días emitirase o fallo que dará a coñecer ao equipo gañador, que recibirá 48.400€, ademais de resultar adxudicatario para a redacción do proxecto básico e de execución. O certame tamén contempla un segundo premio de 24.200€, un terceiro de 18.150€ e accésits de 12.100€ para os restantes estudios de arquitectura finalistas. Unha vez feita pública a decisión, as sete propostas formarán parte dunha exposición aberta ao público na cidade de Pontevedra que se inaugurará en novembro.
Á fase final do concurso de ideas accederon inicialmente oito proxectos arquitectónicos, aínda que o xurado decidiu excluír un dos equipos finalistas por incumprir as bases administrativas e técnicas.
Para o proxecto de rehabilitación integral do pazo, a Xunta conta cun orzamento estimado de máis de 17M€ ata 2026. A súa previsión contempla iniciar as obras o vindeiro ano para rematar a recuperación deste edificio histórico en 2027.
