— Os creadores e creadoras recoñecidos nesta modalidade participan nun coloquio no que dan a coñecer os seus traballos
— As tres propostas gañadoras proceden de Arzúa, A Coruña e Pontevedra, mentres que a mención de honra recae en Vigo
— Trátase dunha das 16 especialidades que completan a convocatoria deste ano dun certame co que a Xunta impulsa o talento da mocidade en diversos eidos
A Consellería de Cultura, Lingua e Xuventude presentou hoxe nun coloquio celebrado no Gaiás os traballos gañadores do certame Xuventude Crea 2024 na categoría de creación de videoxogos. Deste xeito, os autores e autoras premiadas explicaron na charla os seus proxectos, así como a súa traxectoria neste eido e os seus obxectivos para o futuro.
O primeiro premio foi para o videoxogo Maestosia, co que Gael Alberto Quintela, de Arzúa (A Coruña), experimenta coa música e o son como mecánicas xogables, abordando a saúde mental como tema principal. O segundo recoñecemento foi para o grupo Suncorp, da Coruña, con A Hundred Days of Summer, unha proposta que xira ao redor da exploración e o combate experimentado desde os ollos dun neno pequeno con moita imaxinación. Pola súa banda, Laura Cuestas e Alberto Ferrer, de Pontevedra e co pseudónimo Brea Games, recibiron o terceiro galardón por Souri, unha demo dun videoxogo 3D que se basea en aventuras submarinas en terceira persoa na que o protagonista é un peixe.
Ademais, tamén se outorgou unha mención de honra a Dark Arise, cuxa autoría firmada como Muspelheim procede de Vigo, unha aventura dun samurai que se adentra nas escuras profundidades do que foi unha antiga civilización.
A creación de videoxogos é unha das 16 especialidades que compoñen a convocatoria deste ano do Xuventude Crea, que acadou entre todas as súas categorías solicitudes de máis de 600 persoas, a maior participación das súas 15 edicións.
