― En coordinación co Consistorio poiense, terán lugar o luns 30 e o martes 31 de agosto de 9 a 14 horas en horario de mañás e de 16 a 21 horas polas tardes
― A Área Sanitaria de Pontevedra e O Salnés vai convocar por SMS a 3.000 habitantes dentre 15 e 39 anos desta localidade con tarxeta sanitaria activa no Concello
― As mostras nasofarínxeas tomadas en Poio procesaránse no servizo de Microbioloxía do Complexo Hospitalario Universitario de Pontevedra e os resultados negativos serán comunicados por SMS mentres que os casos positivos notificaránse de xeito individual a cada cidadán
A Xunta de Galicia, a través da xestión do Servizo Galego de Saúde, continuará a vindeira semana no Concello de Poio con novos cribados poboacionais con PCR nasofarínxea na Área Sanitaria de Pontevedra e O Salnés cara a detectar o maior número posible de portadores asintomáticos, o que permitirá reducir a cifra de contaxios de coronavirus.
En coordinación co Consistorio poiense, estes cribados voluntarios terán lugar no pabellón de deportes de A Seca os vindeiros luns 30 e martes 31 de agosto, de 9 a 14 horas en horario de mañás e de 16 a 21 horas polas tardes.
Á dita iniciativa preventiva, a Área Sanitaria de Pontevedra e O Salnés vai convocar por SMS a 3.000 habitantes dentre 15 e 39 anos de Poio con tarxeta sanitaria activa nesta localidade.
Dous equipos de enfermaría en cada turno
Para levar a cabo estes cribados no pabellón de deportes de A Seca, a Administración Sanitaria Pública galega contará con dous equipos de enfermaría por cada turno, que efectuarán tarefas de control e cumprimento das medidas de seguridade, realización das tomas de mostras e información aos usuarios.
Todas as mostras tomadas con PCR nasofarínxea no Concello de Poio os vindeiros luns e martes procesaránse no servizo de Microbioloxía do Complexo Hospitalario Universitario de Pontevedra e os resultados serán comunicados aos usuarios por SMS, sempre que estes sexan negativos.
No caso de resultar positivos, estas notificacións comunicaránse de xeito individual a cada cidadán.