- Lembra que se trata “dunha das zonas urbanas máis transitadas de Galicia” ao ser a vía de entrada e saída da cidade de Pontevedra
- A previsión é que o concello licite as obras no primeiro trimestre para que se poidan iniciar en setembro
- Salienta que a Xunta vai investir case 3,5 M€ “en manter en perfecto estado” as estradas autonómicas da provincia de Pontevedra
O presidente da Xunta, Alfonso Rueda, asinou hoxe co alcalde de Poio, Ángel Moldes, un convenio de colaboración polo que se investirán 1,7 millóns de euros -70% aportados polo executivo autonómico e 30% polo goberno local- para acometer a primeira fase da humanización da estrada autonómica PO-308 ao seu paso pola localidade. Ademais, o acordo tamén recolle o cambio de titularidade a favor do concello do dominio público viario asociado á estrada.
Rueda, acompañado da conselleira de Vivenda e Planificación de Infraestruturas, María Martínez Allegue, salientou que se trata “dunha das zonas urbanas máis transitadas de Galicia, nunha posición estratéxica” ao ser a vía de entrada e saída da cidade de Pontevedra e a que canaliza o tráfico do Salnés. E lembrou que a estrada atravesa unha zona na que residen “8.000 persoas” que “teñen dereito” a que “o tráfico intenso sexa compatible cunha contorna o máis humanizada e agradable posible”.
Os primeiros traballos acometeranse entre a Ponte da Barca e o punto quilométrico 0+480 e terán como principais obxectivos garantir a accesibilidade, dar prioridade ao peón e fomentar hábitos saudables. En concreto, entre outras accións, reordenarase o espazo público coa renovación do firme e pavimentación de beirarrúas; crearanse aparcadoiros, zonas de carga e descarga e estacionamento para persoas con mobilidade reducida; e instalaranse zonas axardinadas e mobiliario urbano.
A estimación é que o concello licite as obras no primeiro trimestre deste ano para que poidan iniciarse en setembro. Prolongaranse durante aproximadamente un ano.
Con todo, esta non é a única actuación prevista nesta estrada. En concreto, está en execución o itinerario peonil e ciclista no treito entre Fontenla e Combarro, que logo continuará nun segundo tramo ata Chancelas e O Covelo; e está tamén licitada a renovación da capa de firme nesta e outras estradas.
Durante a súa intervención, o presidente da Xunta salientou a importancia non só de ampliar as infraestruturas viarias senón de garantir “o seu mantemento”. Nesta liña, anunciou que o Goberno galego “vai destinar case 3,5 millóns de euros” a “manter en perfecto estado” as estradas autonómicas da provincia de Pontevedra.
Unhas medidas que se suman a outros esforzos que está facendo a Xunta na materia, como a través do rescate das catro autovías de peaxe en sombra da súa titularidade, que permiten incrementar a capacidade de investimento, ou coas bonificacións nas autoestradas autonómicas AG-55 e AG-57, as máis baratas de Galicia e das máis económicas de España.
