— Anuncia que os Orzamentos de 2023 incluirán unha rebaixa un 25% no Imposto de Patrimonio, que supón unha bonificación da metade da taxa logo de aplicar a mesma baixada no pasado ano
— Subliña que Galicia afonda no seu propio modelo fiscal, que incorporará unha redución do IRPF coa diminución da tarifa no tramo máis baixo da declaración da renda e á consideración das familias de dous fillos como numerosas a efectos fiscais, cun aforro de arredor de 100 M€ para o que queda de lexislatura
O presidente da Xunta, Alfonso Rueda, subliñou esta mañá o esforzo de Galicia por ofrecer certezas e captar investimentos para potenciar unha economía máis competitiva e innovadora.
Rueda sinalou os vindeiros Orzamentos do 2023 como a principal folla de ruta para resolver o “clima de incertezas” marcado pola inflación e a crise enerxética actual. Unhas contas públicas que Galicia volverá aprobar en tempo e forma e que se orientarán a unha Comunidade que responde ás necesidades das familias, á xeración de emprego e ás oportunidades de futuro, ademais de afondar no apoio ás economías domésticas con novas rebaixas fiscais.
Neste sentido, o titular do Executivo autonómico afirmou que Galicia continuará o seu propio modelo fiscal beneficioso para familias e empresas iniciado desde hai anos. Así, Rueda anunciou unha nova redución do 25% no Imposto de Patrimonio, que se suma á redución xa vixente do 25%. Con esta bonificación na metade do tributo, a Comunidade situarase como a terceira con menor presión fiscal sobre o patrimonio persoal, tal e como explicou na súa intervención no foro económico organizado por La Voz de Galicia.
Esta nova redución únese á rebaixa do IRPF aprobada xa para o ano 2022, que sitúa a tarifa autonómica por debaixo da estatal en todos os tramos ata os 35.000 euros, e que beneficiará aos galegos nas súas declaracións a realizar no ano 2023.
En relación a este mesmo imposto, o presidente da Xunta anunciou un novo desconto que situará o tramo máis baixo da declaración da renda no 9% en lugar do 9,4%; e á consideración das familias de dous fillos como numerosas a efectos fiscais. Así, os galegos aforrarán arredor de 100 millóns de euros no tributo da renda no que queda de lexislatura.
Segundo explicou o presidente, “Galicia mírase no seu espello” para decidir a política tributaria, o que permitiu que desde o 2009 a Xunta conseguira aforrarlle ás familias 1.200 millóns de euros. “Aplicamos medidas pensando no que convén facer aquí” e co obxectivo de “que os servizos públicos funcionen”, remarcou.
Axilización no reparto dos fondos europeos
En liña coa necesidade de ofrecer estabilidade no actual escenario económico e de fomentar a captación de investimentos, Alfonso Rueda volveu instar ao Goberno a non deixar pasar a oportunidade dos fondos europeos e a desbloquear a inversión en proxectos tractores presentados por Galicia. O obxectivo, subliñou, pasa por apoiar iniciativas estratéxicas para Galicia que a día de hoxe “non contan con seguridades” de financiamento, como a plataforma para fabricar vehículo eléctricos presentada por Stellantis para Vigo; a planta de Showa Denko na Coruña orientada á mobilidade sustentable; ou o proxecto de Altri para instalar unha planta de fibras téxtiles en Palas de Rei.
Do mesmo xeito, o mandatario autonómico fixo fincapé no interese da comunidade por abandeirar sectores con moito futuro e situarse na vangarda da innovación, e citou, como proba dese compromiso, proxectos como planta de hidróxeno verde prevista para As Pontes, que supoñería un investimento de 156 millóns de euros; ou os plans de revalorización dos residuos gandeiros; os avances na supercomputación e o desenvolvemento da eólica mariña compatible coas actividades pesqueiras.
O presidente da Xunta defendeu un modelo que faga compatible o respecto ao medio ambiente coa actividade económica. Por esa razón, apelou de novo ao Goberno central para liderar a defensa do sector pesqueiro ante a Comisión Europea, logo de decretar veto á pesca de fondo. Un “erro”, considerou, que o Executivo debe recorrer e implicarse porque afecta á economía de toda España.
Bases sólidas para o futuro
No seu relatorio, reivindicou as fortalezas de Galicia para encarar un escenario económico de incógnitas. Entre elas, puxo en valor a cifra de paro máis baixa acada nun mes de agosto da serie histórica, os récords de exportacións, o 74% da produción enerxética procedente de fontes renovables ou a forza de sectores vitais para a economía galega, como o téxtil, o naval, a automoción e o agroalimentario. Finalmente, Rueda reivindicou a política da Xunta orientada á atracción de investimentos empresariais, con simplificacións burocráticas que fomentan a xeración de actividade e emprego.